Ulttyq Olimpiada komiteti bas assambleiasynyń otyrysynda komitettiń bas hatshysy Andrei Kriýkov boksshylardyń Tokiodaǵy sátsizdigine baǵa berdi, dep habarlaidy QazAqparat.
«Bokstan ulttyq qurama komanda Rio oiyndarynyń aldynda AQSh-ta daiyndalyp, Vasilii Levit pen Daniiar Eleýsinov siiaqty úzdikter arnaiy baǵdarlama boiynsha jattyqqan edi. Bul baǵdarlamaǵa tipti biýdjetten tys qarajat bólingen bolatyn. Boksshylar arasynda sońǵy bir jylda eshbir jarystyń bolmaýy olimpiada tsikline daiyndyqty nasharlatty. Tokio Olimpiadasynyń nátijesi ulttyq birinshilikterinde báseke óte joǵary iri elder ǵana jarys tájiribesin ishki jaǵdaida qamtamasyz ete alǵanyn kórsetti», - dedi Andrei Kriýkov.
Onyń aitýyna qaraǵanda, ishki chempionattyń deńgeii AQSh sportshylaryna - jeńil atletikada, boks pen gimnastika salasynda, Japoniia sportshylaryna - dziýdoda, Ońtústik Koreia sportshylaryna - sadaq atý men semserlesýde tabysty óner kórsetýge múmkindik bergen.
«Bizge Aziia elderiniń pandemiia kezinde bir-birinen oqshaý qalǵany da keri áserin tigizdi. Al Eýropa elderinde ózara qatynaý múmkindigi boldy. Osylaisha sportshylar kúntizbesin ózgerissiz qaldyryp, jarys praktikasyn qajetti mólsherde ala bildi. Taldaý júrgize kelip, sarapshylar jarys praktikasynyń bolmaýynan bólek, ulttyq qurama músheleriniń moraldyq-psihologiialyq daiyndyǵy álsiz bolǵanyn aitty. Ásirese jeke sport túrlerinde solai bolǵan. Daiyndyq jattyǵýlarynyń jabyq jaǵdaida ótýi jalǵyz daiyndalatyn sportshylardyń psihologiialyq kóńil-kúiine áser etken. Bapkerlerdiń qatelesken tusy da boldy. Biraq oǵan kóp jaǵdaida pandemiia shekteýinen jol tabý áreketteri sebepker bolǵan», - dedi komitettiń bas hatshysy.
