Ulttyq Olimpiada komitetiniń bas hatshysy Andrei Kriýkov júzýshi Dmitrii Balandinniń Tokiodaǵy sátsizdigi týraly pikir bildirdi, dep habarlaidy QazAqparat.
«Sportshylardy Olimpiadaǵa daiyndaý jospary 4 jyldyq tsiklge eseptelgen. Biraq pandemiia saldarynan jospar buzyldy. 160-tai iri halyqaralyq jarystyń ýaqyty ysyrylyp, bolmai qaldy. Keibir sport túri boiynsha jattyǵý kezeńi 6 aiǵa tolyqtai toqtap turdy. Olimpiada qarsańyndaǵy sport jarystarynyń mańyzy zor ekenin aitý kerek. Sonyń qorytyndysy boiynsha oqý-jattyǵý protsesine qajetti túzetýler engiziletin. Bapkerler pandemiianyń qubylmaly shekteýleri men lokdaýn jaǵdaiynda ikemdi sheshim izdeýge májbúr boldy. Ókinishke qarai, ol sheshimderdiń bári shetinen tabysty bola qoiǵan joq. Bul keibir sport túrleri boiynsha úmitkerlerdi der babyna jetkizýge kedergi boldy», - degen UOK bas hatshysy el medal kútken Dmitrii Balandinniń Japoniiadaǵy jarysqa qalai daiyndalǵanyn mysalǵa keltirdi.
«Chempiondar men kandidattardy Olimpiada aldynda daiyndaý árdaiym arnaiy jospar boiynsha, arnaiy jaǵdaida uiymdastyrylatyn. Bul jerde Dmitrii Balandin bastaǵan júzgishter komandasy uzaq ýaqyt AQSh-qa jiberilgenin aitýǵa bolady. Jastar nátije kórsete de bastaǵan. Tipti jańa litsenziialar men chempiondar bolady dep úmittene bastaǵanbyz. Biraq pandemiia bastalyp, sportshylar elge qaitaryldy», - dedi Andrei Kriýkov.
