Qazaqstan Respýblikasynyń Syrtqy ister ministrligi Resei azamattarynyń Qazaqstanǵa kirý jáne bolý tártibi týraly máselesine túsinikteme berdi, - dep habarlaidy "Ult aqparat" vedomstvonyń baspasóz qyzmetine silteme jasap.
"Qazaqstan-Resei yntymaqtastyǵy árdaiym senimniń joǵary deńgeiimen jáne syndarly tásilderimen erekshelendi. Qazirgi jaǵdaida QR Memlekettik organdary elimizdiń qoldanystaǵy zańnamasyn jáne halyqaralyq sharttardy basshylyqqa alady.
Resei Federatsiiasynyń bizdiń elge keletin azamattary sanynyń ósýine bailanysty keibir qazaqstandyqtardyń alańdaýshylyǵyna orai myna máselelerdi túsindirý qajet dep sanaimyz.
Shetel azamattarynyń Qazaqstanǵa kirý jáne bolý tártibi bar, olardy baqylaýdy QR UQK Shekara qyzmeti jáne tiisinshe QR IIM júzege asyrady.
Qazir barlyq memlekettik organ shtattyq rejimde jumys isteidi jáne jaǵdaidy turaqty baqylaýdy qamtamasyz etip jatyr. Bul rette, kez kelgen eldiń sheteldik azamattarynyń QR aýmaǵynda merzimsiz bolýǵa quqyǵy joq, olar elimizdiń kóshi-qon zańnamasynyń talaptaryn saqtaýy qajet.
Biz quqyqtyq memlekette ómir súrip jatqanymyzdy jáne bizdiń is-áreketterimiz osy qaǵidattardan týyndaýy tiis. Sondyqtan qoldanystaǵy sharttar saqtalýy tiis jáne yqtimal quqyq buzýshylyqtardy ákimshilik tártippen toqtatý kerek.
Memlekette ulttyq múddelerdi qorǵaýdyń tetikteri jetkilikti, bul oraida, ulttyq múdde bárinen de joǵary", - delingen habarlamada.
Vedomstvo bolyp jatqan kez kelgen kúrdeli geosaiasi jaǵdaida biz ulttyq qaýipsizdiktiń basymdyǵyna súienetinin jáne álemde oryn alǵan qubylmaly ahýal memleketimizdiń turaqtylyǵy úshin synaq bolyp otyrǵanyn aitty.
"Sonymen birge, halqymyzǵa tán adamgershilik qasietter belgili bir moraldyq erejelerdi saqtaýdy talap etedi. Azamattarymyz ózindik danalyǵyn kórsetip, qonaqjailylyq dástúrine berik bolady dep senemiz. Qazaqstan - egemendi jáne táýelsiz memleket, qýatty ári uiymshyl el. Memleket basshysy kez kelgen jaǵdaida halyq birliginiń mańyzdy ekenin birneshe ret aitty. Qazirgi qiyn kezeńde kez kelgen ótkir málimdeme nemese áreket jaǵymsyz áser týdyrýy múmkin ekenin este ustaǵan jón.
Búgingi tańda Qazaqstannyń infraqurylymy kóshi-qonnyń qazirgi jaǵdaiynan salystyrmaly túrde aýyrtpalyqsyz ótýge múmkindik beredi. Qyzmet kórsetý jáne servis obektileri de óz qýattary aiasynda jumys isteidi.
Biz aǵymdaǵy ahýalǵa muqiiat monitoring júrgizip otyrmyz jáne eleýli bir qaterler týyndaǵan kezde halyqaralyq quqyq pen ulttyq zańnamany eskere otyryp, tiisti sharalar qabyldanatyn bolady. Biz memlekettik organdardyń resmi jáne obektiv aqparatyna sený mańyzdy dep sanaimyz, bul qajetsiz alańdaýshylyqtyń aldyn alýǵa kómektesedi", - delingen habarlamada.
