Foto: Mýhtor Holdorbekov/Kazinform
Baǵdarlama resmi túrde 2024 jyldyń 1 qańtarynda bastaldy. Onyń sheńberinde 2006 jyldan bastap týylǵan árbir balaǵa Ulttyq qordan jyl saiyn qarajat aýdarý kózdelgen. Bul týraly Úkimettiń baspasóz qyzmeti habarlady.
Meditsinalyq jáne áleýmettik qoldaý júiesin tolyqtyra otyryp, memleket bolashaq urpaq úshin qarjylyq turaqtylyqtyń uzaqmerzimdi tetikterin engizip jatyr. Mundai tetik 2022 jylǵy 1 qyrkúiekte Prezident Qasym-Jomart Toqaevtyń «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda jariialanǵan «Ulttyq qor — balalarǵa» jobasy boldy.
Jobany Úkimet Qarjy ministrligi arqyly iske asyrady jáne Ulttyq qordyń jyl saiynǵy investitsiialyq tabysynyń 50%-yn balalardyń 18 jasqa tolǵanǵa deiingi arnaiy jinaqtaýshy shottaryna merziminen buryn alý quqyǵynsyz aýdarýdy kózdeidi. Jinaqtalǵan qarjyny turǵyn úi satyp alýǵa jáne bilim alýǵa paidalanýǵa bolady.
Baǵdarlama resmi túrde 2024 jyldyń 1 qańtarynda bastaldy. Onyń sheńberinde 2006 jyldan bastap týylǵan árbir balaǵa Ulttyq qordan jyl saiyn qarajat aýdarý kózdelgen.
Qarjy ministrliginiń málimetinshe, ótken jyly baǵdarlamaǵa 6 919 131 adam — 2006 jyldan 2023 jylǵa deiin qosa alǵanda týylǵan balalar qatysty. Olardyń árqaisysyna $100,52 esepteldi.
Esepteýdiń jalpy somasy $695,5 mln-dy qurady. Ulttyq qordan aqsha eseptelgen balalardyń jalpy sanynan 2024 jyly 304 815 adam 18 jasqa jetti, olarǵa jalpy somasy $30,6 mln aýdaryldy.
2025 jyly qatysýshylar sany 6 921 035 balaǵa deiin ósti, onyń 324 430-y biyl 18 jasqa tolady, al esepteýler $129,38 qurady.
Baǵdarlamaǵa eki jyldan beri qatysyp kele jatqan balalarda investitsiialyq kiristi qosa eseptegende, jinaqtardyń jalpy somasy — $232,94. Ulttyq qordan berilgen jalpy soma $1,5 mlrd-ty qurady.
Qarajat bala 18 jasqa tolǵanǵa deiin jinaqtalady, sodan keiin olardy turǵyn úi jaǵdailaryn jaqsartýǵa nemese oqý aqysyn tóleýge paidalanýǵa bolady. Osy maqsattarǵa 118 myńnan astam ótinim berildi, onyń 97 myńy oryndaldy. Jalpy somasy $11 mln 399,1 myń. Atap aitqanda, turǵyn úi jaǵdailaryn jaqsartýǵa 63 871 ótinim berildi, onyń ishinde 56 591 ótinim oryndaldy jáne $6, 647,9 mln tólendi. Oqý aqysyn tóleýge 54 270 ótinim berildi, onyń ishinde 40 466 ótinim oryndaldy jáne $4,751,2 mln tólendi.
Búgingi tańda «Ulttyq qor — balalarǵa» bastamasy árbir balanyń bolashaǵy úshin qarjylyq baza qurýǵa baǵyttalǵan uzaqmerzimdi memlekettik qoldaý nysany bolyp sanalady.
