Foto: freepik
Qazaqstan Respýblikasynyń Ulttyq banki Memleket basshysynyń bastamasymen iske qosylǵan "Ulttyq qor – balalarǵa" baǵdarlamasy aiasynda 18 jasqa deiingi (qosa alǵanda) balalarǵa kezekti nysanaly tólemder eseptelgenin málimdedi, - dep habarlaidy Ulttyq banktiń baspasóz qyzmeti.
Taratylǵan habarlamaǵa sáikes, "Ulttyq qor – balalarǵa" baǵdarlamasy aiasynda 2025 jylǵy qorytyndysy boiynsha árbir balanyń shotyna 130,71 AQSh dollary eseptelgen. 2025 jyldyń sońyndaǵy málimet boiynsha, baǵdarlamaǵa qatysýshylardyń jalpy sany 6 918 656 bala boldy.
"Ulttyq qor – balalarǵa" baǵdarlamasy 2024 jylǵy 1 qańtardan bastap iske qosyldy. 2024 jyly ár balaǵa eseptelgen soma 100,52 AQSh dollar bolǵan. 2025 jyly 129,38 AQSh dollary eseptelgen.
Ulttyq bankte balalarǵa esepteletin qarajat jyl saiyn Qazaqstan Respýblikasynyń Ulttyq qorynyń uzaq merzimdi investitsiialyq kirisiniń jartysy esebinen qalyptasatynyn jáne bul tikelei qordyń valiýtalyq aktivteriniń kólemine bailanysty ekenin eske saldy. Sonymen qatar, aldyńǵy jyldary balalardyń shottaryna eseptelgen qarajat bala 18 jasqa tolǵanǵa deiin Ulttyq qordyń portfelinde investitsiialanýyn jalǵastyryp, qosymsha tabys ákeledi.
Baǵdarlama iske asqan 3 jyl ishinde (investitsiialyq tabysty qosa eseptegende) bir balaǵa shaqqandaǵy jalpy jinaqtalǵan soma - 370,56 AQSh dollar. Tiisti aqparat 31 qańtarda eGov mobile mobildi qosymshasynda jáne kids.enpf.kz saitynda qoljetimdi bolady.
