Qytaidyń Pinduoduo saýda alańy men Claude jasandy intellekt kómekshisin ázirlegen amerikalyq Anthropic kompaniiasy Qazaqstan biýdjetine jalpy 8 mlrd teńge tóledi, dep habarlaidy ult.kz.
Salyqtyq ákimshilendirý nátijesinde Pinduoduo biýdjetke 6,8 mlrd teńge, iaǵni shamamen 15,1 mln dollar aýdarǵan. Al Anthropic ótken salyq kezeńderi úshin 1,2 mlrd teńge, shamamen 2,6 mln dollar tóledi. Kompaniia kameraldyq baqylaý nátijesinde jiberilgen habarlamalardyń talaptaryn oryndaǵan.
Memlekettik kirister komiteti Qazaqstanda jumys isteitin sheteldik internet alańdarynyń salyq tóleýin baqylaýdy jalǵastyryp jatqanyn málimdedi. Qazaqstanda sheteldik internet kompaniialaryna qosylǵan qun salyǵyn tóleý talaby qoldanylady. 2026 jyldan bastap onyń mólsherlemesi 16 paiyzǵa deiin ósti.
Sonymen birge salyq talabyn oryndamaǵan sheteldik internet alańdarynyń jumysyna shekteý qoiylýy múmkin. Komitet Ulybritaniiada tirkelgen Farfetch saýda alańyna kameraldyq baqylaý qorytyndysy boiynsha habarlama jibergen. Kompaniia talapty oryndamaǵandyqtan, onyń internet-resýrsyna Qazaqstan aýmaǵynda kirý shekteldi.
Farfetch arqyly kiim, aiaqkiim, aksessýarlar jáne álemdik brendterdiń basqa da taýarlary satylady. Komitet mundai shara salyq mindettemesin oryndamaityn ózge sheteldik internet alańdaryna da zańda belgilengen tártippen qoldanylatynyn eskertti.
