2026 jylǵy 20 qazanda Qazaqstan fýtbol federatsiiasynyń Baqylaý, tártiptik jáne etikalyq komitetiniń otyrysy ótti, dep habarlaidy ult.kz.
Otyrysta 2026 jylǵy maýsymdaǵy Premer-liganyń 23-týry aiasynda ótken «Aqtóbe» FK – «Ordabasy» FK matchynyń qorytyndysy boiynsha tómendegi sheshimder qabyldandy:
Oiyndy uiymdastyrý talaptary men qaýipsizdik qaǵidalaryn jáne Chempionat reglamentin buzǵany, atap aitqanda matchtyń resmi tulǵalarynyń qaýipsizdigin tiisti deńgeide qamtamasyz etpegeni, sonyń ishinde «Aqtóbe» FK direktory B. Dúzelbaevtyń tóreshiler bólmesine ruqsatsyz kirgeni úshin, Tártiptik reglamenttiń 63-babynyń 1-tarmaǵyna sáikes, «Aqtóbe» FK-ǵa 300 AEK kóleminde aiyppul salynsyn. Aiyppul 2026 jylǵy 20 qarashaǵa deiin (qosa alǵanda) tólenýi tiis.
Komanda jankúierleriniń ádepsiz qylyǵy, iaǵni matchtyń resmi ókilderine balaǵat sózder aityp, qarsylas komandaǵa til tigizgeni úshin, Tártiptik reglamenttiń 64-babynyń 1-tarmaǵyna sáikes, «Aqtóbe» FK-ǵa 200 AEK kóleminde aiyppul salynsyn. Aiyppul 2026 jylǵy 20 qarashaǵa deiin (qosa alǵanda) tólenýi tiis.
Abyroi men bedelge nuqsan keltiretin málimdeme jasaǵany úshin, QFF Ádep kodeksiniń 6-taraýynyń 23-tarmaǵy men 15-taraýynyń 48-tarmaǵyna sáikes, «Aqtóbe» FK bas bapkeri I. G. Cherevchenkoǵa 50 AEK kóleminde aiyppul salynsyn. Aiyppul 2026 jylǵy 20 qarashaǵa deiin (qosa alǵanda) tólenýi tiis.
Komandanyń kiim aýystyratyn bólmeden kesh shyǵyp, oiynnyń bastalýyn 3 minýtqa keshiktirgeni úshin, Tártiptik reglamenttiń 63-babynyń 1-tarmaǵyna sáikes, «Ordabasy» FK-ǵa 60 AEK kóleminde aiyppul salynsyn. Aiyppul 2026 jylǵy 20 qarashaǵa deiin (qosa alǵanda) tólenýi tiis.
QFF qaýipsizdik talaptaryn, jarys reglamentin jáne kásibi ádep normalaryn buljytpai oryndaý – fýtbol matchtaryn ótkizýdiń basty talaby ekenin eskertedi. Klýbtar oiyndardy talapqa sai ótkizýge, óz ókilderi men jankúierleriniń tártibine, sondai-aq jarysqa qatysýshylardyń barlyǵynyń ortaq erejelerdi saqtaýyna tikelei jaýapty.
Federatsiia stadiondarda tolyq qaýipsizdikti qamtamasyz etý, fýtbol qaýymdastyǵy arasynda ózara qurmetti nyǵaitý jáne kezdesýlerdi belgilengen standarttarǵa sai ótkizý jolyndaǵy júieli ustanymyn jalǵastyra beredi.
