Prezidenttiń tapsyrmasymen memlekettik ýniversitetter kommertsiialyq emes aktsionerlik qoǵamdar formasyna aýysqanymen, jekeshelendirilmeidi jáne memleket menshiginde qalady. Bul týraly QR Bilim jáne ǵylym ministri Ashat Aimaǵambetov Facebook-tegi paraqshasynda jazdy, dep habarlaidy "Ult aqparat".
«Ulttyq qoǵamdyq senim keńesi otyrysynda Memleket basshysy ulttyq jáne memlekettik joǵary oqý oryndaryn tek memleket menshiginde qaldyrý týraly tapsyrma berdi.
Qazirgi ýaqytta memlekettik joǵary oqý oryndary kommertsiialyq emes aktsionerlik qoǵamǵa ainaldy. Qurylymnyń ózgerýinen keiin el ishinde sol ýniversitetterdiń jekemenshikke satylýy múmkin degen kúdik paida boldy.
Prezident memlekettik joǵary oqý oryndarynyń satylmaityny týraly naqty aitty. Bul – óte mańyzdy.
Sebebi sol JOO-larda elimizdegi stýdentterdiń 40% oqidy jáne 35 myńnan astam oqytýshy men qyzmetker jumys isteidi.
Olardyń basym bóligi XX ǵasyrdyń 30-40 jyldary quryldy jáne tarihi turǵydan da elimizdiń basty salalyq joǵary oqý oryndary bolyp tabylady», - dedi ministr.
A.Aimaǵambetov atap ótkendei, ál-Farabi atyndaǵy QazUÝ, Satbayev University (Q. Sətbaev atyndaǵy QazUTZÝ) jáne Abai atyndaǵy QazUPÝ siiaqty joǵary oqý oryndary elimizde bilim berý júiesi, ǵylymi jáne innovatsiialyq áleýeti jaǵynan aldyńǵy qatarda.
«Sonymen birge memleket joǵary bilim salasyndaǵy jeke sektorǵa da aitarlyqtai qoldaý kórsetip keledi. Sebebi qazirgi ýaqytta joǵary oqý oryndarynyń 50% jekemenshik bolyp tabylady.
Rasynda memlekettik JOO-ny jekeshelendirý otandyq bilim berý júiesiniń, ǵylymi-zertteý jáne innovatsiialyq qyzmetiniń tutastyǵyna orny tolmas ziian keltirip, ýniversitetterdiń múliktik kesheniniń buzylýyna da sebep bolýy múmkin.
Osylaisha, Prezidenttiń tapsyrmasy boiynsha memlekettik ýniversitetter kommertsiialyq emes aktsionerlik qoǵamdar formasyna aýysqanymen, jekeshelendirilmeidi jáne memleket menshiginde qalady.
Bul rette, olar akademiialyq turǵyda áldeqaida erkin jáne qoǵam aldynda esep berip, barynsha ashyq jumys istei alady», - dep túiindedi Bilim ministri.
Eske salaiyq, búgin Ulttyq qoǵamdyq senim keńesiniń 4-otyrysynda Memleket basshysy Qasym-Jomart Toqaev elimizde memlekettik jáne ulttyq joǵary oqý oryndary satylmaitynyn atap ótti.
«Meniń tapsyrmama sáikes, joǵary oqý oryndarynyń qurylymyn ózgertý jumystary júrgizilýde. Kóptegen joǵary oqý orny kommertsiialyq emes aktsionerlik qoǵamǵa ainaldy. Bul el ishinde ártúrli áńgime týǵyzýda. Sondai-aq biri memlekettik joǵary oqý oryndary keiinnen jekemenshikke satylýy múmkin degen de kúdik bar. Osyǵan orai memlekettik jáne ulttyq joǵary oqý oryndary satylmaityny jóninde málimdeimin», - dedi Prezident.
