Shyǵys Qazaqstan oblysynda meditsinalyq nysandardy jańǵyrtý jáne Óskemenniń jol-kólik infraqurylymyn damytýǵa 105,7 mlrd teńge baǵyttaldy. Bul qarajatqa kópbeiindi aýrýhana salý, perzenthanany rekonstrýktsiialaý, Ertis ózeni arqyly ótetin kópir men jol airyǵyn jańartý josparlanǵan, dep habarlaidy ult.kz.
300 oryndyq aýrýhana salynyp jatyr
Óskemen qalasynyń 19-shaǵyn aýdanynda 300 orynǵa arnalǵan kópbeiindi aýrýhana qurylysy júrgizilip jatyr. Nysannyń jalpy aýdany – 42,5 myń sharshy metr. Jobaǵa qosymsha 33,3 mlrd teńge bólindi.
Qazir qurylys jumystarynyń daiyndyq deńgeii 28%-ǵa jetken. Meditsinalyq jabdyqtardy satyp alý aiaqtalǵan. Aýrýhanany 2027 jyldyń sońyna deiin paidalanýǵa berý josparlanǵan.
Meditsinalyq mekemede hirýrgiia, travmatologiia, kardiologiia, neirohirýrgiia bólimsheleri men insýlt ortalyǵy jumys isteidi. Aýrýhana jylyna 13,6 myń patsientke qyzmet kórsetýge eseptelgen.
Perzenthana jylyna qosymsha 2 myń áieldi qabyldai alady
Óskemendegi Ana men bala ortalyǵynyń statsionar ǵimaratyn perzenthana retinde qaita jabdyqtaý jumystary da jalǵasyp jatyr. Jobaǵa 2026 jyly qosymsha 2,4 mlrd teńge bólindi.
Jalpy aýdany 12,2 myń sharshy metr bolatyn ǵimarattyń daiyndyǵy 90%-ǵa jetken. Nysandy 2026 jyldyń tórtinshi toqsanynda paidalanýǵa berý kózdelgen.
Qaita jańǵyrtý aiaqtalǵannan keiin perzenthana jylyna qosymsha 2 myńǵa deiin áieldi qabyldai alady. Shyǵys Qazaqstan oblysynda jyl saiyn orta eseppen 5 300 bala dúniege keledi.
Ertis arqyly ótetin jańa kópir salynady
Óskemendegi jol-kólik infraqurylymyn damytýǵa da qomaqty qarajat qarastyrylǵan. Serikbaev kóshesin uzartý jáne Ertis ózeni arqyly ótetin jańa kópir salý jobasyna biyl qosymsha 55 mlrd teńge bólindi.
Joba aiasynda uzyndyǵy 2,3 shaqyrym bolatyn alty jolaqty jol jáne uzyndyǵy 834,8 metr kópir salynady. Sondai-aq jaiaý júrginshiler men velosiped joldary qarastyrylǵan.
Jańa kópir qalanyń ortalyǵy men sol jaǵalaýy arasyndaǵy qatynasty jaqsartyp, táýligine 80 myńnan astam kólik ótetin qoldanystaǵy Ertis kópirine túsetin júktemeni azaitýǵa múmkindik beredi. Qurylysty 2029 jyly aiaqtaý josparlanǵan.
Jol airyǵy 2027 jyly tolyq paidalanýǵa beriledi
Sátbaev dańǵyly men Jibek joly kóshesiniń qiylysyndaǵy kólik airyǵyn qaita jańǵyrtýǵa qosymsha 15 mlrd teńge bólindi. Qazir qurylys jumystarynyń 72%-y oryndalǵan.
Nysandy kezeń-kezeńimen paidalanýǵa berý josparlanyp otyr. 2026 jylǵy 25 qazanda Sátbaev kóshesi baǵytyndaǵy qozǵalysty ashý, al jyl sońyna deiin Esenberlin kóshesi baǵytyndaǵy qozǵalysty iske qosý kózdelgen. Kólik airyǵy 2027 jyly tolyq paidalanýǵa beriledi.
Joba qalanyń sol jaǵalaý bóligine, Menovnoe jáne Ahmirovo turǵyn alaptaryna, sondai-aq «Jibek matalar kombinaty» shaǵyn aýdanyna qatynaýdy jeńildetýge baǵyttalǵan.
Atalǵan jobalar júzege assa, Óskemende meditsinalyq kómektiń qoljetimdiligi artyp, joldardaǵy kólik qozǵalysy jaqsarady.
