Qazaqstan Respýblikasy Táýelsizdiginiń 35 jyldyǵy qarsańynda respýblikalyq patriottyq ánder baiqaýy jariialandy, dep habarlaidy ult.kz.
Baiqaý Otan, týǵan jer jáne el birligi taqyrybyndaǵy jańa týyndylardy tanytýǵa, talantty avtorlardy anyqtaýǵa jáne zamanaýi patriottyq ánder qoryn tolyqtyrýǵa baǵyttalady.
Baiqaýǵa elimizdiń barlyq óńirinen aqyndar men kompozitorlar, sonyń ishinde shyǵarmashylyq jolyn endi bastaǵan avtorlar qatysa alady. Buǵan deiin jariialanbaǵan jáne oryndalmaǵan ánder qabyldanady.
Baiqaý úsh baǵyt boiynsha ótedi. Olar: saltanatty patriottyq ánder, lirikalyq patriottyq ánder jáne zamanaýi patriottyq ánder. Qatysýshylar bir nemese birneshe baǵyt boiynsha shyǵarma usyna alady.
Týyndylardy kompozitorlar, aqyndar men mýzyka mamandarynan quralǵan sarapshylar keńesi baǵalaidy. Sarapshylar baǵa berýde ánniń áýeni, mátininiń sapasy, avtorlyq ideiasynyń tyń bolýy jáne tyńdarmanǵa áserin negizge alady.
Sarapshylar keńesiniń múshesi, aqyn Qalqaman Sarinniń aitýynsha, baiqaý Otan men ulttyq bolmys taqyrybyn arqaý etetin ári tyńdarman kóńilinen shyǵatyn ánderdiń jazylýyn kózdeidi.
Baiqaýdyń jalpy júlde qory – 30 mln teńge. Qarajatty demeýshiler bólgen. Júldeler tómendegidei belgilengen:
• Bas júlde – 6 mln teńge;
• I oryn – árqaisysy 4 mln teńgeden úsh júlde;
• II oryn – árqaisysy 3 mln teńgeden úsh júlde;
• III oryn – árqaisysy 1 mln teńgeden úsh júlde.
Ótinimder 2026 jylǵy 5 jeltoqsanǵa deiin khabar.kz/konkurs saitynda qabyldanady. Jeńimpazdar Qazaqstan Respýblikasynyń Táýelsizdik kúni qarsańynda jariialanady.
