Nur-Sultan qalasynyń Esil aýdandyq sotynda ulttyq ekonomika ministrligi kásipkerlikti damytý departamentiniń direktory Aslanbek Jaqypovqa qatysty alǵashqy sot tyńdaýy ótti, dep habarlaidy Sputnik agenttigi.
Sýdia Qanat Tobaǵaliulynyń suraǵyna jaýap bergen aiyptalýshy 1987 jyly úshinshi tamyzda Aqmola oblysy Kókshetaý qalasynda dúnie kelgenin aitty.
"Eki joǵary bilimim bar: zań jáne ekonomika salasynda, saiasattaný boiynsha magistr dárejesin alǵanmyn, iskerlik basqarý doktorymyn. Ulttyq ekonomika ministrligi kásipkerlikti damytý departamentiniń direktorymyn. Úilenbegenmin, osy jazda shańyraq kótergeli otyrmyn", - dedi Jaqypov.
Ulttyq ekonomika ministrliginiń baspasóz qyzmeti habarlaǵandai, Aslanbek Jaqypov qyzmetinen bosatylyp nemese shettetilmegen, qazir eńbek demalysynda eken.
Is boiynsha memlekettik aiyptaýshy – prokýror Murat Edil. Otyrys bastalǵannan keiin aiyptaý taraby men jábirlenýshiler sot otyrysyn 29 mamyrǵa qaldyrý týraly ótinishhat berdi.
Sheneýnikke Qazaqstannyń Qylmystyq kodeksiniń 190-baby úshinshi bólimi (Jaýapty memlekettik laýazym iesiniń alaiaqtyq jasaýy) boiynsha aiyp taǵylǵan.
Bul bap boiynsha sottalýshy úsh jyldan jeti jylǵa deiin bas bostandyǵynan aiyrylyp, múlki tárkilenedi, sondai-aq, belgili bir qyzmetti atqarý quqyǵynan ómir boiyna aiyrylady.
Eske sala ketsek, Aslanbek Jaqypovqa biyl sáýir aiynda 500 myń teńge para aldy degen aiyp taǵyldy.
Keiinirek sybailas jemqorlyqqa qarsy is-qimyl ulttyq biýrosy habarlaǵandai, ulttyq ekonomika ministrliginiń birqatar laýazymdy tulǵasyna qatysty sotqa deiingi tergeý bastalǵan bolatyn. Jaqypovtyń isi alaiaqtyq babymen almastyryldy.
