Astanada Vladislav Andriýshkin esimdi jigit súiiktisi Alinany óltirip, onyń jinaǵan aqshasyn dosynyń esepshotyna aýdarǵan. Qylmystan keiin eshteńe bolmaǵandai áreket etken er adam 10 jylǵa bas bostandyǵynan aiyryldy, dep habarlaidy ult.kz.
Kozachkov offside Telegram arnasynyń málimetinshe, Alina men Vladislav biyl qańtarda internet arqyly tanysqan. Alaida kóp uzamai qyz qarym-qatynasty toqtatýǵa sheshim qabyldaǵan. Ol Tailandqa saparǵa daiyndalyp, jolǵa aqsha jinaǵan.
4 aqpanda ekeýi qaita kezdesip, birge ýaqyt ótkizgen. Keiin qyz turyp jatqan páterge barǵan. Sol jerde Vladislav ony óltirgen. Artynsha marqumnyń bank shotyndaǵy aqshany dosynyń esepshotyna aýdaryp, taksimen ketip qalǵan.
Kelesi kúni kúdikti dosynan aqshany qolma-qol sheship berýdi suraǵan. Tarazǵa ketpek bolǵan ol jolda ustaldy. Al Alinanyń denesin jaqyndary páterinen tapqan.
Sotta Vladislav kisi óltirý aiybyn abaisyzda adam ólimine ákep soǵý babyna aýystyrýdy suraǵan. Alaida sot qylmystyń qasaqana jasalǵanyn anyqtap, ony 10 jylǵa sottady. Úkim zańdy kúshine engen.
Marqumnyń ápkesi Aleksandra jazanyń tym jeńil ekenin aityp, sot sheshimimen kelispeitinin jetkizdi. Onyń sózinshe, sottalǵan adam bir kúni bostandyqqa shyǵady, al onyń sińlisi endi eshqashan oralmaidy.
