Búgin Úkimettiń keńeitilgen otyrysynda QR Ulttyq bank tóraǵasy Erbolat Dosaev infliatsiia men valiýta baǵamyna qatysty byltyrǵy jylǵy qorytyndyny jariialady, - dep habarlaidy QazAqparat.
«2019 jyldyń qorytyndysy boiynsha, infliatsiia 5,4% boldy, bul 4-6% nysanaly dálizge sáikes keledi. Kóbinese nan-toqash ónimderi men jarmanyń baǵasynyń 16,1%, sondai-aq et jáne et ónimderiniń 13,2% ósýi esebinen 9,6%-ke qymbattaǵan azyq-túlik taýarlary infliatsiiaǵa eń kóp úles qosty. Azyq-túlikke jatpaityn taýarlar men aqyly qyzmetter baǵasynyń ósýi qalypty boldy», - dedi E. Dosaev.
Onyń sózine qaraǵanda, aqsha-kredit saiasatynyń negizgi quraly retinde bazalyq stavka tutynýshylyq jáne investitsiialyq suranystyń keńeiýine bailanysty proinfliatsiialyq faktorlar yqpalynyń saqtalýy aiasynda +/- 1 protsenttik tarmaq dálizimen 9,25% deńgeiinde saqtaldy.
«2019 jyly qoǵam tarapynan júrgizilip otyrǵan valiýtalyq saiasatqa jáne ulttyq valiýtanyń baǵamyna joǵary nazar aýdaryldy. Bul rette, ótken jyl ishinde bir AQSh dollary úshin teńge baǵamy 373-390 teńge shegindegi 4,5 paiyzdyq aralyqta boldy. 2019 jyly teńge jyldyń sońyna qarai bir AQSh dollary úshin 382,6 teńgege deiin 0,4 paiyzǵa nyǵaidy, al 2018 jyly ol 15,6 paiyǵa álsiredi», - dedi UB basshysy.
