Ulttyq bank tóraǵasy Erbolat Dosaev depozitterge qatysty ózgeristi jariialady, dep habarlaidy Sputnik Qazaqstan tilshisi.
Bas bankirdiń sózine qaraǵanda, shetel valiýtasyn el ishinde ustap otyrý maqsatynda ekinshi deńgeili bankter úshin depozittiń jańa túri engiziledi. Ony ulttyq banktiń ózinde ashýǵa bolady.
"Valiýtalyq aktivterdi el ishinde saqtaýdy yntalandyrý úshin jańa qural retinde 1 shildeden bastap bankterdiń ulttyq banktegi valiýtalyq depozitteri engiziledi. Mundai depozitterdiń merzimi – bir ai. Al jyldyq mólsherlemesi 0,5 protsentke deiin bolady", - dedi Dosaev úkimettiń búgingi otyrysynda.
Onyń aitýynsha, kepildik berý qory usynǵan qazaqstandyq depozitter boiynsha eń joǵary mólsherleme ózgerip otyr.
"Halyqtyń teńgedegi merzimdi emes depozitteri boiynsha usynylǵan mólsherlemeni 2019 jyldyń 1 shildesinen bastap 10,5%-ten 9,8%-ke deiin tómendetý týraly sheshim qabyldandy. Sonymen qatar, biyl 1 maýsymnan bastap on eki ai jáne odan joǵary merzimmen shetel valiýtasyndaǵy jinaq pen merzimdi depozitter boiynsha 2 protsentke deiin kóterildi. Bul shara bankterdiń mindettemelerin uzartýǵa baǵyttalǵan", - dep atap kórsetti Dosaev.
