QR Ulttyq banki tóraǵasynyń orynbasary Áliia Moldabekova aqpan aiynda Ulttyq qordan aýdarymdar týraly málimetterdi jariialady. Sondai-aq Ulttyq banktiń altyn satyp alý josparlary týraly aityp berdi, dep habarlaidy "Ult aqparat".
«Aqpan aiynda Ulttyq qordan biýdjetke alynatyn transfert 263 mlrd teńgeni qurady. Kepildendirilgen transfertti qamtamasyz etý úshin 462,5 million dollar nemese 175 milliard teńge satyldy. Barlyq kólemdi bir aidyń ishinde birjada sattyq», - dedi Ulttyq bank tóraǵasynyń orynbasary.
Sondai-aq, ol valiýtalyq interventsiianyń áseri týraly aitty.
«Aldyn ala málimetter boiynsha, rezervter bir aida 550 mln dollarǵa artyp, 29,9 mlrd dollardy qurady. Qorlardyń valiýtalyq bóligi 104 mln dollardan 9,6 mlrd dollarǵa tómendedi. Bul altyn portfeliniń qunyn 658 mln dollardan 20,3 mlrd dollarǵa deiin ulǵaitýmen tolyqty. Óz kezeginde, altyn aktivteri 1580 dollardan 1626 dollarǵa deiin ósti. Bul álemdik ekonomikanyń baiaýlaýyna jáne tazartylǵan altynnyń fizikalyq kóleminiń 1,7 tonnaǵa artýyna bailanysty boldy», - dedi Áliia Moldabekova.
Aqpan aiynda jergilikti óndirýshilerden 3,6 tonnaǵa jýyq altyn satyp alyndy, onyń ishinde jańa tujyrymdama aiasynda 1,9 tonna Ulttyq qorǵa satyldy.
«Ózimizdiń elde óndirilgen altyndy satyp alýdy jalǵastyramyz. 2019 jyly shamamen 57 tonna altyn satyp alyndy, biyl 60 tonnaǵa jýyǵyn satyp alýdy josparlap otyrmyz. Álemdik qarjy naryǵyndaǵy belgisizdik jaǵdaiynda qazir altyn halyqaralyq rezervterdiń saqtalýyn qamtamasyz etetin qaýipsiz aktivtiń biri ekenin kórsetedi», - dedi Á.Moldabekova.
Sonymen qatar, ol altyn valiýta aktivteri men Ulttyq qorǵa arnalǵan investitsiialyq strategiialardyń jobasy týraly aityp berdi.
«Altyn valiýta aktivteri turǵysynan alǵanda AQSh dollarynyń úlesi 52% -dan 62% deiin ósti. Bul korei vony men japon ienasyna salynǵan investitsiialardyń azaiýyna bailanysty bolyp otyr. Jańa valiýtany bólý táýekeldiń qalypty deńgeiinde aktivterdiń kiristiligin arttyrady. Ulttyq qor jinaq portfeliniń 1% deiin Qytaidyń memlekettik obligatsiialaryn investitsiialaýdy josparlap otyr. Iýan álemdik kapital naryǵynyń ajyramas bóligine ainalýda. Álemdik indeksterge qytaidyń baǵaly qaǵazdaryn qosý institýtsionaldy investorlar tarapynan suranystyń artýyna ákelýi múmkin. Bul ózgerister rentabeldilikti arttyryp qana qoimai, aktivterdi strategiialyq bólýdi ońtailandyrady», - dedi Ulttyq bank tóraǵasynyń orynbasary.
