Belgili ánshi, aktrisa Qaragóz Súleimenova ákesi, jazýshy Asqar Súleimenovtiń ekinshi jubaiy Áliia Bópejanovamen qarym-qatynasy týraly ashyq aitty. Óner iesi ákesiniń jeke ómirine qatysty buryn kópshilikke belgisiz jaittardy baiandap, jazýshynyń qoljazbalaryna bailanysty renishin jetkizdi, dep habarlaidy ult.kz.

Qaragóz Súleimenova bul týraly jýrnalist Janar Baisemizge bergen suhbatynda aitty. Ánshiniń sózinshe, Áliia Bópejanova bastapqyda ákesine shákirt retinde kelip júrgen. Keiin ekeýiniń arasynda jaqyn qarym-qatynas ornap, ortaq qyzdary dúniege kelgen.
Óner iesi ákesiniń ekinshi ret otbasyn qurǵany týraly aitylatyn áńgimelermen tolyq kelispeitinin jetkizdi.
"Ol ekinshi ret shańyraq kóterdi dep aita almaimyn. Áliia Bópejanova "jazýshynyń zaiybymyn, áielimin" deidi. Biraq aqiqaty olai emes. Iá, arada qyz bar. Biraq ol kisi ákemdi qulai súidi, jaqsy kórdi. Ol kisi ákeme shákirt siiaqty edi, keletin, ketetin", – dedi ánshi.
Qaragózdiń aitýynsha, ákesi men Áliia Bópejanova qyzdary dúniege kelgennen keiin ǵana resmi nekege turǵan. Ánshi mundai sheshim balanyń týý týraly kýáligine ákesiniń tegin jazdyrý úshin qabyldanǵanyn aitty.
Suhbat barysynda Qaragóz Súleimenova ákesiniń ádebi murasyna qatysty da sóz qozǵady. Onyń aitýynsha, jazýshy ómirden ótken soń qoljazbalary men jeke qujattary ózine tapsyrylǵan. Keiin Áliia Bópejanova olardy jinaqtap, kitap etip shyǵarý úshin surap alǵan. Ánshi ádebiettanýshynyń Asqar Súleimenov shyǵarmalaryn jaryqqa shyǵarýǵa sińirgen eńbegin joǵary baǵalaitynyn jasyrmady.
"Ol kisige rizamyz. Ákemniń qaǵazdaryn rettep, kitap qylyp shyǵarǵany úshin. Árine, ol kisi baspalarmen sóilesti. Óitkeni ómir boiy kitap tóńireginde júrgen adam. Oǵan rizashylyǵymyz sheksiz", – dedi ol.
Alaida óner iesiniń aitýynsha, keiin ákesiniń qoljazbalaryn qaitaryp alýǵa tyrysqanymen, qujattardyń basym bóligi ózine berilmegen.
"100 paiyzdyń bálkim 10 paiyzy qalǵan shyǵar, onyń ústinde kserokstan ótken dúnieler. Maǵan ol qaǵazdar qaitqan joq. Kúni búginge deiin ol kisige osy úshin narazymyn. Ol meniń ákemniń qaǵazy. Meniń qolymnan alǵan dúnieni maǵan nege qaitaryp bermeisiz?" – dep renishin bildirdi Qaragóz Súleimenova.
Ánshi ákesiniń shyǵarmalaryn jinaqtap, oqyrmanǵa jetkizgeni úshin Áliia Bópejanovaǵa alǵys aitqanymen, jazýshynyń túpnusqa qoljazbalary otbasyna qaitarylýy kerek dep esepteidi.
Aita keteiik, bul – Qaragóz Súleimenovanyń suhbatta aitqan jeke pikiri men estelikteri. Áliia Bópejanovanyń atalǵan máselege qatysty ustanymy materialda keltirilmegen.