بەلگٸلٸ ەنشٸ, اكتريسا قاراگٶز سٷلەيمەنوۆا ەكەسٸ, جازۋشى اسقار سٷلەيمەنوۆتٸڭ ەكٸنشٸ جۇبايى ەلييا بٶپەجانوۆامەن قارىم-قاتىناسى تۋرالى اشىق ايتتى. ٶنەر يەسٸ ەكەسٸنٸڭ جەكە ٶمٸرٸنە قاتىستى بۇرىن كٶپشٸلٸككە بەلگٸسٸز جايتتاردى بايانداپ, جازۋشىنىڭ قولجازبالارىنا بايلانىستى رەنٸشٸن جەتكٸزدٸ, دەپ حابارلايدى ult.kz.

قاراگٶز سٷلەيمەنوۆا بۇل تۋرالى جۋرناليست جانار بايسەمٸزگە بەرگەن سۇحباتىندا ايتتى. ەنشٸنٸڭ سٶزٸنشە, ەلييا بٶپەجانوۆا باستاپقىدا ەكەسٸنە شەكٸرت رەتٸندە كەلٸپ جٷرگەن. كەيٸن ەكەۋٸنٸڭ اراسىندا جاقىن قارىم-قاتىناس ورناپ, ورتاق قىزدارى دٷنيەگە كەلگەن.
ٶنەر يەسٸ ەكەسٸنٸڭ ەكٸنشٸ رەت وتباسىن قۇرعانى تۋرالى ايتىلاتىن ەڭگٸمەلەرمەن تولىق كەلٸسپەيتٸنٸن جەتكٸزدٸ.
"ول ەكٸنشٸ رەت شاڭىراق كٶتەردٸ دەپ ايتا المايمىن. ەلييا بٶپەجانوۆا "جازۋشىنىڭ زايىبىمىن, ەيەلٸمٸن" دەيدٸ. بٸراق اقيقاتى ولاي ەمەس. يە, ارادا قىز بار. بٸراق ول كٸسٸ ەكەمدٸ قۇلاي سٷيدٸ, جاقسى كٶردٸ. ول كٸسٸ ەكەمە شەكٸرت سيياقتى ەدٸ, كەلەتٸن, كەتەتٸن", – دەدٸ ەنشٸ.
قاراگٶزدٸڭ ايتۋىنشا, ەكەسٸ مەن ەلييا بٶپەجانوۆا قىزدارى دٷنيەگە كەلگەننەن كەيٸن عانا رەسمي نەكەگە تۇرعان. ەنشٸ مۇنداي شەشٸم بالانىڭ تۋۋ تۋرالى كۋەلٸگٸنە ەكەسٸنٸڭ تەگٸن جازدىرۋ ٷشٸن قابىلدانعانىن ايتتى.
سۇحبات بارىسىندا قاراگٶز سٷلەيمەنوۆا ەكەسٸنٸڭ ەدەبي مۇراسىنا قاتىستى دا سٶز قوزعادى. ونىڭ ايتۋىنشا, جازۋشى ٶمٸردەن ٶتكەن سوڭ قولجازبالارى مەن جەكە قۇجاتتارى ٶزٸنە تاپسىرىلعان. كەيٸن ەلييا بٶپەجانوۆا ولاردى جيناقتاپ, كٸتاپ ەتٸپ شىعارۋ ٷشٸن سۇراپ العان. ەنشٸ ەدەبيەتتانۋشىنىڭ اسقار سٷلەيمەنوۆ شىعارمالارىن جارىققا شىعارۋعا سٸڭٸرگەن ەڭبەگٸن جوعارى باعالايتىنىن جاسىرمادى.
"ول كٸسٸگە ريزامىز. ەكەمنٸڭ قاعازدارىن رەتتەپ, كٸتاپ قىلىپ شىعارعانى ٷشٸن. ەرينە, ول كٸسٸ باسپالارمەن سٶيلەستٸ. ٶيتكەنٸ ٶمٸر بويى كٸتاپ تٶڭٸرەگٸندە جٷرگەن ادام. وعان ريزاشىلىعىمىز شەكسٸز", – دەدٸ ول.
الايدا ٶنەر يەسٸنٸڭ ايتۋىنشا, كەيٸن ەكەسٸنٸڭ قولجازبالارىن قايتارىپ الۋعا تىرىسقانىمەن, قۇجاتتاردىڭ باسىم بٶلٸگٸ ٶزٸنە بەرٸلمەگەن.
"100 پايىزدىڭ بەلكٸم 10 پايىزى قالعان شىعار, ونىڭ ٷستٸندە كسەروكستان ٶتكەن دٷنيەلەر. ماعان ول قاعازدار قايتقان جوق. كٷنٸ بٷگٸنگە دەيٸن ول كٸسٸگە وسى ٷشٸن نارازىمىن. ول مەنٸڭ ەكەمنٸڭ قاعازى. مەنٸڭ قولىمنان العان دٷنيەنٸ ماعان نەگە قايتارىپ بەرمەيسٸز?" – دەپ رەنٸشٸن بٸلدٸردٸ قاراگٶز سٷلەيمەنوۆا.
ەنشٸ ەكەسٸنٸڭ شىعارمالارىن جيناقتاپ, وقىرمانعا جەتكٸزگەنٸ ٷشٸن ەلييا بٶپەجانوۆاعا العىس ايتقانىمەن, جازۋشىنىڭ تٷپنۇسقا قولجازبالارى وتباسىنا قايتارىلۋى كەرەك دەپ ەسەپتەيدٸ.
ايتا كەتەيٸك, بۇل – قاراگٶز سٷلەيمەنوۆانىڭ سۇحباتتا ايتقان جەكە پٸكٸرٸ مەن ەستەلٸكتەرٸ. ەلييا بٶپەجانوۆانىڭ اتالعان مەسەلەگە قاتىستى ۇستانىمى ماتەريالدا كەلتٸرٸلمەگەن.