Ulttyq bank bazalyq mólsherlemeni +/- 1,00 paiyzdyq tarmaq dálizimen jyldyq 14 paiyz deńgeiinde belgileý týraly sheshim qabyldady, - dep habarlady "Ult aqparat".
"Ótimdilikti usyný turǵysynan turaqty qoljetimdi operatsiialar boiynsha mólsherleme 15 paiyz, al ótimdilikti alý boiynsha turaqty qoljetimdi operatsiialar boiynsha mólsherleme 13 paiyz bolady.
Bazalyq mólsherlemeni kóterý týraly sheshim geosaiasi táýekelderdiń saldarynan infliatsiialyq qysymnyń kúsheiýi, álemde, sondai-aq Qazaqstannyń saýdadaǵy seriktes elderindegi baǵanyń ósýi men olardyń eldegi ishki baǵaǵa aýysýy jaǵdaiynda Ulttyq banktiń infliatsiiaǵa qarsy saiasat júrgizýge beiildiligin kórsetedi. Úsh jyl boiy baiqalyp otyrǵan oń fiskaldyq qarqyn infliatsiialyq protsesterdiń mańyzdy qozǵaýshy kúni bolyp qala beredi", - delingen habarlamada.
Ulttyq banktiń málimetinshe, 2022 jyldyń naýryz aiynda jyldyq infliatsiia teńge baǵamy álsirep, suranys kóbeigende jáne jetkizilim tizbegi buzylǵanda 12 paiyzǵa (2022 jylǵy aqpanda - 8,7 paiyz) deiin qarqyn aldy. Azyq-túlik jáne azyq-túlikke jatpaityn taýarlar baǵasynyń jyldyq ósý qarqyny, sáikesinshe 15,4 paiyzdan (10 paiyz) jáne 10,9 paiyzǵa (8,6 paiyz) jetti. Aqyly qyzmettiń quny 8,3 paiyzǵa (7,1 paiyz) ósti.
"Infliatsiianyń turaqty qalypta údeýi taýarlar men qyzmetterdiń keń spektrine baǵanyń ósýimen sipattalady, bunyń ózi 2022 jylǵy naýryzda bazalyq infliatsiianyń aitarlyqtai ósýimen rastalady.
Infliatsiiaǵa qatysty kútýler bir orynda turaqtap qalǵan emes jáne ol joǵary qubylmalylyqty kórsetýin jalǵastyryp keledi. 2022 jyldyń naýryz aiynda júrgizilgen saýalnama qorytyndysy geosaiasi ahýaldyń nasharlaǵanyn, ulttyq valiýtanyń qunsyzdanýyn kórsetetin qoǵamdyq optimizmniń tómendeýin jáne infliatsiialyq kútýlerdiń aitarlyqtai artqanyn kórsetedi. Sóitip, infliatsiiany bir jyl alǵa sandyq baǵalaý 11,4 paiyzdy qurady", - delingen habarlamada.
Ulttyq bank aqparatyna súiensek, fiskaldy saiasat infliatsiiaǵa qarsy aitarlyqtai qysym kórsetedi.
"2022 jyly respýblikalyq biýdjettiń shyǵyny ótken úsh jylda ortasha ósý qarqyny 16,7% bolǵan kezinde 23,6%-ǵa ósedi. Saqtalyp otyrǵan oń fiskaldyq serpin 2022 jyldaǵydai 2023 jyly da infliatsiiaǵa qarsy qysym kórsetedi. 2022 jyly Ulttyq qordan biýdjet tapshylyǵyn qarjylandyrýǵa beriletin transfert 4,6 trln teńgeni quraidy, salystyrmaly túrde alyp qaraǵanda, pandemiia men jalpy ishki ónim 2,6%-ǵa qysqarǵanda 2020 jylǵy 4,8 trln teńge bólingen edi. Respýblikalyq biýdjet tapshylyǵyn halyqaralyq aktivtermen qarjylandyrý valiýta baǵamyn qoldaýǵa, sonymen qatar importty arttyrýǵa, básekege qabilettilikti tómendetýge jáne taza fiskaldyq pozitsiiany álsiretýge múmkindik beredi.
2022 jyldyń birinshi toqsan qorytyndysy boiynsha, Qazaqstanda ekonomikalyq belsendilik ósimi jyldyq mánde 4,4% boldy. Qańtarda eldiń barlyq aýmaǵynda tótenshe jaǵdai rejimi engizilgendegi ósimniń baiaý úrdisi aqpan aiynan bastap ekonomikanyń kóptegen salalarynda jaqsy kórsetkishter baiqaldy. Joǵary tutynýshylyq suranys iskerlik belsendilikke birshama qoldaý kórsetti. 2022 jyldyń naýryz aiynda bólshek saýdadaǵy taýar ainalymynyń ósimi jyldyq mánde 3,7%-ǵa deiin qarqyn aldy. Úi sharýashylyǵyndaǵy tutyný kórsetkishi tutynýshylyq nesieleýdiń jáne halyqtyń naqty kiristeriniń ósýimen de qoldaý tapty" - deidi Ulttyq banktiń baspasóz qyzmeti.
