Bul shoýlar osylai jalǵasa bere me?
Qazir telearna baǵdarlamalarynyń deni – shoý. Shoýdan ózge baǵdarlama jobasyn aparsań ilýde biri bolmasa iske aspaidy. Al, shoýdyń qandai túrin aparsań da qanyn jerge tamyzbai ilip áketedi. Sol úshin sizben bizdiń úidegi kók sandyqty ashyp qalsaq – bir ártistiń ishken-jegeni, kúlgen-júrgeni jaily qyzylsheke tartys bolyp jatady nemese ortaǵa bir máseleni kóldeneń salyp qoiady da, eki jaqqa bólinip alyp qyzylóńesh daýdy sapyrady-ai kep!
Baǵdarlamanyń sipaty shoý bolǵasyn mindetti túrde tartys bolýy kerek. Shoýdyń sharty – myń adam – myń pikir. Ol durys pa, teris pe esep emes. Tek birińdi-biriń qaitalamaisyń, qarsy shyǵasyń.
Mysaly, ortaǵa kádimgi as ishetin qasyqty tastap qoidy delik, shoýǵa jinalǵandardyń biri toby ony qasyq dep aqiqi mánin aitsa, qalǵany ony teriske shyǵarady. Óitpese, shoý baǵdarlama sharty buzylady.
Dál osy tusta biliktisi de, bilimsizi de bir-birine qarsy shabady. Ákesindei kisige bala, balasyndai kisige áke sóz bermei, qyjyrtyp, qyńyrlatyp jurtty bir kúldirip, shapalaq soqtyryp tastasa, jeńgen ittei quiryǵyn qaiqaityp, bet-júzi albyrap toiat taba qalady. Onymen de toqtamaidy, kelesi biri «bul qasyq emes, kúrektiń kishireigen túri, muny buryn eski dáýirde bir ǵalym… birdeńe degen…» osylai kete beredi. Mundaida 50 jastaǵy ǵalym bilimdiliginen ne paida? 15 jastaǵy oqýshynyń bilmeitindiginen ne ziian? Oilanyp qalady ekensiń.
Shoýdy júrgizýshiler (arnaiy jattyqqan adam) jalyny qaitqan shalanyń shoǵyn qaǵystyryp kósep-kósep jiberdi. Shoq onan saiyn qyzaryp, jalyndap kete jazdap ázer tur.
Sonymen ne deiik, aqyry baǵdarlamaǵa berilgen ýaqyt ta aiaqtaidy. Jarq-jurq etip ekran jabylady. Jáýdirep otyrǵan kórermenniń hali ne boldy? Álgi talqyǵa túsken zatymyz qasyq boldy ma, kúrek pe, ojaý ma, álde sypyrǵysh pa?
Endi qyzyqty qarańyz, qasyqty qasyq dep tanityn beiýaz kórermenniń hali ne boldy? Ań-tań. Teledidarǵa shyǵyp sóilegen kisilerdiń bári beker adamdar emes shyǵar, shynyda bul ózi qasyq pa? Joq ana bir kisiniki qisyndy ma? Qaraptan qarap otyryp bas qatyratyn másele shyqty… Mine, kórermenniń ýaqytyn alyp, aldandyrý.
Qasyqtyń kúrek emes ekeni shyndyq. Endeshe nege bas qatyrý kerek?
Qazaq aitady, «ótiriktiń ózine senbeidi, ebine senedi» -dep. Myń-million ótirik, bir aqiqatty búrkemelep álek...
Ularbek Nurǵalymulynyń feisbýktegi jazbasynan
