Ýkraina ortalyq sailaý komissiiasy (OSK) prezident sailaýynyń ekinshi týrynda berilgen daýystyń bárin sanap bitti. Komissiia habarlaýynsha, akter Vladimir Zelenskii barlyq daýystyń 73,22 paiyzyn alǵan. Ony shamamen 13,5 million adam qoldaǵan, dep jazady Azattyq.
Ýkrainanyń qazirgi prezidenti Petr Poroshenkoǵa sailaýshylardyń 24,45 paiyzy - shamamen 4,5 million adam daýys bergen.
OSK 2,31 paiyz daýysty jaramsyz dep tapqan. Ekinshi týrǵa daýys berýge azamattardyń 61,37 paiyzy kelgen.
Ýkrainada prezident sailaýynyń ekinshi kezeńi 21 sáýirde ótti. Jańa memleket basshysy retinde akter, shoýmen Vladimir Zelenskii sailanǵan. Qarsylasy Poroshenko jeńilgenin moiyndaǵanymen, keler sailaýǵa qatysatynyn málimdedi. Zelenskii prezident qyzmetine 3 maýsymǵa deiin kirisýi tiis.
