Ýkraina qaýipsizdik qyzmeti burynǵy depýtat, "Motor Sich" kásipornynyń direktory Viacheslav Bogýslaevty "memleketke satqyndyq jasady" degen kúdikpen ustady. Bul jóninde kúshtik qurylymdaǵy derekkózderge súiengen "ZaBor" basylymy habarlady, dep jazady Azattyq.
"Ýkrainskaia pravda" derekkóziniń habarlaýynsha, kásipker "basqynshy-memleketpen" "aýyz jalasty" degen kúdikke ilingen.
22 qazanda 83 jastaǵy Bogýslaevtyń úiinde tintý júrgizildi. "ZaBor"-dyń jazýynsha, kásipker esigin ashýdan bas tartqannan keiin quqyq qorǵaý organ ókilderi arnaiy qural paidalanǵan.
"Memleketke satqyndyq jasaý" baby boiynsha kúdikke ilingen Bogýslaevtyń kinási dáleldense, ómirlik túrmege kesilýi múmkin. Ony Zaporojeden Kievke qaraýylmen apara jatqany habarlandy.
Ýkrainalyq saiasi, qoǵam qairatkeri Viacheslav Bogýslaev Radanyń 5,6,7,8-shaqyrylymdaǵy depýtaty bolǵan. 1994 jyldan beri "Motor Sich" kásipornynyń basqarma jetekshisi, bas direktory. Ol - Ýkrainadaǵy eń aýqatty 25 adamnyń biri.
"Motor Sich" aviatsiia salasynda gaz týrbinasy qozǵaltqyshy men ónerkásiptik qondyrǵylardy óndirip, jóndeýmen ainalysady.
