Ýkraina prezidenti Vladimir Zelenskii Tegeran túbinde qulaǵan ushaqtyń qaza bolǵan jolaýshylarynyń jaqyndaryna kóńil aitty, – dep habarlaidy RIA Novosti.
"Taiaý Shyǵystan sýyt habar. Búgin tańerteń Imam Homeini halyqaralyq áýejaiynan ushyp shyqqan "Ýkraina halyqaralyq áýe jelileri" kompaniiasynyń jolaýshylar ushaǵy apatqa ushyrap, áýejai mańyna qulady. Aldyn ala málimet boiynsha, barlyq jolaýshy men ekipaj músheleri qaza bolǵan. Bizdiń elshilik tragediianyń mán-jaiy men qaza bolǵandardyń tizimin naqtylap jatyr. Jolaýshylar men ekipaj músheleriniń jaqyndaryna qaiǵyryp kóńil aitamyn", - dep jazdy Zelenskii feisbýktegi paraqshasynda.
Tragediia búgin tańerteń Imam Homeini atyndaǵy Tegeran halyqaralyq áýejaiynyń mańynda boldy.
Tegerannan Kievke bet alǵan Boeing 737 ushaǵy áýege kóterilgennen keiin eki minýttan soń qulaǵan.
Irannyń azamattyq aviatsiia ókili lainer bortynda 167 jolaýshy bolǵanyn málimdedi. Resmi derekterge súiensek, tiri qalǵandar joq.
Iran TJ basqarmasynyń basshysy jolaýshylardyń deni Iran azamattary bolǵanyn málimdedi.
Tegeran áýejaiynyń ókili habarlaǵandai, ýkrainalyq ushaqtyń qulaýyna qozǵaltqyshtyń órtenýi sebep bolǵan.
Qazir oqiǵa ornynda qutqarýshylar jumys istep jatyr.
Qazaqstannyń syrtqy ister ministrligi ushaq bortynda qazaqstandyqtar bolmaǵanyn málimdedi.
