31 naýryzǵa qaraǵan túni Ýkraina Joǵarǵy radasy jer satý týraly zańdy qabyldady.
Koronavirýsqa qaramastan shaqyrylǵan parlamenttik sessiia otyrysy shamamen 12 saǵatqa sozylyp, jarym túnde aiaqtaldy. Otyrystyń sońy daýǵa ulasty. Zań jobasyna qarsy shyqqan "Oppozitsionnaia platforma – Za jizn" fraktsiiasy parlament jumysyn toqtatýǵa tyrysty. Prezident Vladimir Zelenskii depýtattardy zańdy qoldap daýys berýge úgitteý úshin Radaǵa eki ret kelip ketti. Buǵan deiin depýtattar qujatqa tórt myńnan astam ózgeris engizý máselesin qarastyrǵan.
Aqyry jer satý týraly zańǵa 259 depýtat qoldap daýys berip, qabyldandy. Prezidenttik "Slýga naroda" fraktsiiasynyń basym bóligi qujatty qoldaǵan. Oǵan sonymen birge burynǵy prezident Petr Poroshenkonyń "Evropeiskaia solidarnost" jáne Sviatoslav Vakarchýktiń "Golos" fraktsiiasy qoldap daýys bergen. Iýliia Timoshenkonyń "Batkivshina" jáne "Oppozitsionnaia platforma – Za jizn" fraktsiiasy ǵana qarsy shyqqan.
Qabyldanǵan jańa zańǵa sáikes, 2021 jyldyń 1 shildesinen bastap jer satylymǵa shyǵarylady. 2024 jylǵa deiin jerdi tek jeke tulǵalar satyp alady, bir adamǵa 100 gektardan artyq jer berilmeidi. Keiinirek zańdy tulǵalar 10 myń gektarǵa deiin jer satyp ala alady.
Biraq soǵan qaramastan qujat memleket menshigindegi jerdi jekeshelendirýge tyiym salady. Sheteldikterge jer satý máselesi jalpyhalyqtyq referendýmnan keiin belgili bolady. Jerdi ofshorlyq kompaniialar, benefitsiary Resei azamaty bolatyn zańdy tulǵalar satyp ala almaidy.
Buǵan deiin Ýkraina prezidenti Vladimir Zelenskii parlamenttik fraktsiia jetekshilerimen jeke kezdesip, zańdy qoldaýǵa úgittigen. Kelissózden keiin qujatqa qarsy bolyp kelgen "Evropeiskaia solidarnost" fraktsiiasy qoldaǵan.
Halyqaralyq valiýta qory jáne birneshe eýropalyq nesie berý uiymdary aýyl sharýashylyq maqsatyndaǵy jerdi naryqqa shyǵarýdy qoldap, bul reforma jolyndaǵy mańyzdy qadam dep atap ótti. Jer satý týraly zań qabyldanǵan jaǵdaida Ýkrainanyń 10 mlrd dollar kóleminde nesie alýǵa múmkindigi paida bolady dep aitylady. Zelenskii muny rastaǵanmen "jeti million ýkrainalyqty basybaily quqyqtan aiyrý úshin" zańdy qoldaǵanyn aitqan.
