Foto: ashyq derekkóz
Ýkraina men Resei taǵy tutqyn almasty: ýkrain jaǵyna – 107, dál sonsha áskeri qyzmetker Resei jaǵyna oraldy. Bul týraly Ýkraina pezidenti keńsesiniń jetekshisi Andrei Ermak habarlady. Ýkrainamen tutqyn almasqanyn Resei qorǵanys ministrligi de rastady, dep jazady Azattyq.
Ýkraina jaǵyna oralǵan 107 adamnyń 101-i – qatardaǵy jaýynger nemese serjant, altaýy – ofitser. 74-i Mariýpoldaǵy "Azovstal" zaýytyn qorǵaǵan.
"Biz soǵysta jaralanǵan kóp adamdy qaitara aldyq. Atap aitqanda, Mariýpolde aýyr jaralanǵan "Azovstaldaǵy" jigitterimizdi qaitardyq. Aiaq-qolynan aiyrylǵan, denesi kúigen, jarasyna infektsiia túsken adamdar bar. Elenovka koloniiasyndaǵy jarylysta jaralanǵan jaýynger bar" dedi Ermak.
Al Resei qorǵanys ministrligi tutqynda bolǵan azamattary jóninde eshqandai aqparat jariialamady.
"Bosatylǵandar Resei áýe ǵarysh kúshterine qarasty áskeri kólik aviatsiia ushaqtarymen Máskeýge emdeýge jetkiziledi. Barlyǵyna meditsinalyq, psihologiialyq kómek kórsetiledi" dep habarlady vedomstvo.
26 qazanda Ýkraina men Resei tutqyn almasyp, árqaisysy on jaýyngerdi qaitarǵan. Buǵan qosa Resei Ýkraina jaǵynda soǵysyp, 23 tamyzda qaza tapqan AQSh armiiasynyń ardageri, amerikalyq erikti Djoshýa Alan Djonstyń súiegin bergen.
Qazannyń ortasynda Ýkraina Resei jaǵynda tutqynda bolǵan 108 áiel jaýyngerin qaitaryp alǵan. Arasynda "Azovstaldan" evakýatsiialanǵan 37 áiel bar. Qaitarylǵandardyń 11-i – ofitser, 85-i – qatardaǵy jaýynger men serjant.
21 qyrkúiekte Ýkrainaǵa 215 áskeri tuqyn qaitarylǵan, arasynda 124 ofitser bar. 108-i – "Azov" jaýyngerleri. Buǵan qosa, shekara qyzmeti, politsiia, qurlyq áskeri sarbazdary bar.
21 qyrkúiekte jariialanǵan kelisim aiasynda tutqyn almasqanda Kiev Resei jaǵyna ýkrainalyq saiasatker, soǵys bastalǵannan keiin tyiym salynǵan reseishil "Oppozitsionnaia platforma — Za jizn" partiiasynyń jetekshisi, Vladimir Pýtinniń qudasy Viktor Medvedchýkti qaitarǵan.
