QR UQK Shekara qyzmeti direktorynyń birinshi orynbasary Aidar Aimýrzin Atyraý oblysynyń Kóptoǵai aýyly tusyndaǵy shekaralyq qorshaýǵa qatysty týyndaǵan máselege túsinikteme berdi, dep habarlaidy "Ult aqparat".
«Internette aitylǵandai, memlekettik shekara syzyǵy 70-90 jyldardaǵy kartaǵa sai keledi. Kelisimshart 2005 jyly qol qoiylyp, ratifikatsiialanǵan jáne tarihi qalyptasqan ákimshilik shekarany eskeredi. Zańnamaǵa sáikes, shekara qyzmetiniń atalǵan ýchaskede eni 100 metr bolatyn shekara jolaǵynda qorshaýdan injenerlik qurylys júrgizýge quqy bar. Iaǵni, qorshaý ótken jermen memlekettik shekara syzyǵy ótedi degendi bildirmeidi. Qorshaý memlekettik shekara syzyǵynan 100 metr qashyqta. 2008 jyly jergilikti turǵyndardyń ótinishteri boiynsha ornatylǵan edi. Óitkeni, maldyń qarsy betke ótý jaǵdaiy jii boldy jáne bul másele eki taraptyń ókilderimen sheshiletindikten, birshama qiyndyq týdyrdy. Al bul joly 2009 jyly demarkatsiia júrgizilgennen keiin qorshaýdyń kesip ótýin túzetý qajet boldy. Aýmaqqa qatysty qandai da sheginis joq», - dedi ol taratylǵan videoda.
Onyń atap ótýinshe, 2008 jyly Kóptoǵai aýylynyń turǵyndary RF aýmaǵyna maldary jaiylyp ketpeýi úshin qorshaý turǵyzý týraly ótinish bergen.
«Jergilikti turǵyndar Qiǵash ózeni sýatyna shyǵa alady. Ol shamamen ońǵa qarai 150 metr ǵana. Ózenniń ol tusy tereńdeý jáne mal RF aýmaǵyna ótip kete almaidy. Degenmen, jergilikti turǵyndardyń qalaýy boiynsha ákimdikpen sýatqa qolaily ári yńǵaily qol jetkizý máselesin sheshemiz. Qorshaýdyń ózin ornatý - bul jańalyq emes. Ol halyqaralyq tájiribe sanalady. Kez kelgen el qorshaý ornatýǵa quqyly. Negizinen ol shekara rejimin, onyń ishinde karantindik rejimdi qamtamasyz etýge baǵyttalǵan. Bizdiń shekara qorshaýyn ýaqytsha alyp tastaýǵa qatysty kópjyldyq tájiribemiz bar. Ony kiik, aqbóken syndy janýarlardyń maýsymdyq kóshi-qony kezinde qoldanamyz. Sondyqtan bul - sheshiletin másele», - dedi Aidar Aimýrzin.
Sondai-aq, ol Kóptoǵai aýylyna qatysty taraǵan video 2 fragmentten montajdalǵanyn aitty.
«Senbi kúni áleýmettik jelide taraǵan feik-videoǵa qatysty aitar bolsam, ol - montajdalǵan. Eki fragmentten montajdalǵan. Birinshisi - Mańǵystaý oblysynda qazirgi ýaqytta aiaqtalǵan oqý-jattyǵýdaǵy shyn video. Ol jerde shekaradan jappai ótý jáne bosqyndar lagerin uiymdastyrý elementteri pysyqtaldy. Ekinshisi de - Kóptoǵai aýylyndaǵy shynaiy jaǵdai, jergilikti turǵyndardyń naqty jiyny», - dedi Aidar Aimýrzin.
Onyń atap ótýinshe, osy eki oqiǵany biriktirgen sátte Kóptoǵai aýylynda bolǵan jait burmalanyp kórsetilgen.
«Aita keterligi, qazirgi ýaqytta oblys ákimdiginiń bizdiń oblystyq departamenttiń basshylyǵymen jinalys ótip jatyr. Ázirshe jaǵdai turaqty, jergilikti turǵyndar túsinistik tanytyp otyr. Bizde týyndaǵan barlyq máseleni eskerýge tyrysamyz. Taǵy da qaitalap aitamyn, jerge qatysty sheginis joq. Turǵyndardyń sýǵa barý múmkindigi saqtalǵan. Buǵan qosa, sýǵa munan da yńǵaily jetý máselesi sheshiletin bolady», - dedi ol.
Eske salaiyq, b iylǵy 14 sáýirde Atyraý oblysy, Qurmanǵazy aýdanynyń Kóptoǵai aýylynda Reseidiń Astrahan oblysymen shekarasynda jańa shekaralyq qorshaý turǵyzyla bastaǵan bolatyn. Jumystardy QR UQK áskeri qyzmetshileri júrgizdi.
Al búgin shekara qyzmetkerleri ornatqan baǵanalardy qaita alyp tastaǵany belgili boldy.
