QR Premer-Ministri Álihan Smaiylov Ulttyq ekonomika, Aýyl sharýashylyǵy, Ekologiia, geologiia jáne tabiǵi resýrstar, Tótenshe jaǵdailar, Qorǵanys ministrlikteriniń basshylyǵymen Úkimettiń 2022 jylǵa arnalǵan is-qimyl baǵdarlamasyn ázirleý máseleleri jóninde keńester ótkizdi. Bul týraly Úkimettiń baspasóz qyzmeti habarlady.
Ulttyq ekonomika ministrligi usynǵan sharalar halyqtyń tabysyn arttyrýǵa, shaǵyn jáne orta biznesti damytýǵa, jańa investitsiialyq saiasatty qalyptastyrýǵa, memlekettiń el ekonomikasyna qatysý úlesin qysqartýǵa, makroekonomikalyq turaqtylyqty qamtamasyz etýge, memlekettik basqarý júiesin jańǵyrtýǵa jáne tariftik saiasatty jetildirýge baǵyttalǵan.
Aýyl sharýashylyǵy ministrligi usynǵan sharalar jańa alma baqtaryn otyrǵyzý, et ónimderin qaita óńdeý, qus etin óndirý, balyq ósirý, kartop pen kókónisterdi saqtaý jónindegi investitsiialyq jobalardy iske asyrýdy kózdeidi. Aýyl sharýashylyǵy taýaryn óndirýshilerdi jeńildetilgen nesiemen, kóktemgi egis jumystaryn júrgizýge arzandatylǵan dizel otynymen qamtamasyz etý, AÓK sýbektilerin sýbsidiialaý júiesin jetildirý, veterinariialyq júieni reformalaý josparlanyp otyr. Óndiriske zamanaýi resýrs únemdeýshi tehnologiialardy engizý, tuqym sharýashylyǵyn jáne jem-shóp óndirisin damytý boiynsha sharalar qabyldanady.
Ekologiia, geologiia jáne tabiǵi resýrstar ministrligi qorshaǵan ortaǵa lastaýysh zattar shyǵaryndylaryn azaitý, lastanǵan jerlerdi qalpyna keltirý, ziiandy qaldyqtar jinaqtalǵan baiyrǵy qoimalardy joiý, qaldyqtardy basqarý júiesin jetildirý, kólderdi qalpyna keltirý, sý infraqurylymyn tsifrlandyrý, balyq salasyn damytý sharalaryn usyndy. Ýtilizatsiialyq alym mólsherlemesi qaita qaralady.
Tótenshe jaǵdailar ministrligi azamattyq qorǵanys áskeri bólimderiniń uiymdyq-shtattyq qurylymyn reformalaý, azamattyq qorǵaý organdarynyń materialdyq-tehnikalyq jáne áleýmettik qamtamasyz etilýin nyǵaitý jóninde sharalar qabyldaýdy kózdep otyr.
Qorǵanys ministrligi Qarýly Kúshterdi reformalaý jónindegi birinshi kezektegi mindetterdi iske asyrý boiynsha sharalar qabyldaidy. Áskerlerdiń jaýyngerlik ázirligi men jaýyngerlik qabiletin arttyrý maqsatynda jeke quramnyń sanyn ulǵaitý, áskerlerdi zamanaýi qarý-jaraqpen jáne áskeri tehnikamen jaraqtandyrý, qajetti áskeri infraqurylymmen jaraqtandyrý sharalary kózdelgen.
