Foto: ashyq derekkóz
Úkimet rezervinen Ulytaý oblysynyń sýmen jabdyqtaý infraqurylymyn jańǵyrtýǵa 1,8 mlrd teńge bólindi, dep habarlaidy Ult.kz.
Tiisti qaýlyǵa Premer-ministr Oljas Bektenov qol qoidy. Qarajat Prezidenttiń halyqtyń ómir súrý sapasyn arttyrý jáne aýyz sýmen qamtamasyz etý jónindegi tapsyrmalaryn júzege asyrý maqsatynda Jezqazǵan qalasynyń sharýashylyq-aýyz sý tazartý qurylystaryn rekonstrýktsiialaýdy aiaqtaýǵa baǵyttalǵan.
Jumys istep turǵan keshen 1966 jyly paidalanýǵa berilgen, jabdyqtyń tozýy 90%-ǵa jetti.
Qazirgi ýaqytta nysanda uzyndyǵy 4 shaqyrym injenerlik jeliler (káriz, jylýmen jabdyqtaý, jaryqtandyrý) tartylyp, transformatorlyq qosalqy stansalar men taratý qurylǵylary salyndy. Súzilgen jáne aýyz sýǵa arnalǵan 4 rezervýar rekonstrýktsiialandy jáne paidalanýǵa berildi, sorǵy jabdyǵy jańartyldy.
Úkimet rezervinen bólingen qarajat nysannyń qurylys-montaj jumystaryn aiaqtap, 2026 jyly josparly paidalanýǵa múmkindik beredi.
Jezqazǵannyń infraqurylymyn jańǵyrtý jónindegi jumys — halyqtyń sýmen jabdyqtaý qyzmetterine qoljetimdiligin qamtamasyz etý jónindegi júieli jumystyń bir bóligi. 2024 jyldyń qorytyndysy boiynsha sapaly aýyz sýǵa qoljetimdilik: qalalarda – 99,4%, aýyldyq eldi mekenderde – 98%-dy quraidy.
100% kórsetkishke qol jetkizý úshin 2025 jyly Úkimet respýblikalyq biýdjette 257 jobany júzege asyrýǵa 105,7 mlrd teńge qarastyrǵan. Budan bólek, Arnaýly memlekettik qordyń qarajaty esebinen 229 jobany júzege asyrýǵa qosymsha 135,8 mlrd teńge bólindi.
Úkimet bólingen qarajattyń ýaqtyly maqsatty igerilýin jáne Prezidenttiń azamattardyń ál-aýqatyn jaqsartý jónindegi tapsyrmalaryn oryndaý úshin júrgiziletin jumystardyń sapasyn baqylaidy.
