Almatyda ruqsat qujattarynsyz salynǵan «Jetisý-Semireche» bazaryn buzý bastaldy. Aýmaǵy 56 myń sharshy metrden asatyn nysanǵa qatysty sot sheshimi shyqqannan keiin menshik iesi qurylystardy óz kúshimen buzýǵa kirisken, dep habarlaidy ult.kz.
Almaty qalasy Qala qurylysyn baqylaý basqarmasynyń málimetinshe, Túrksib aýdanyndaǵy Qairat shaǵynaýdanynda ornalasqan bazardy «Statýs Construction» JShS tiisti ruqsat qujattarynsyz salǵan.
Tekserý nátijesinde zańbuzýshylyqtar anyqtalyp, menshik iesine olardy joiý týraly nusqama berilgen. Alaida belgilengen talaptar oryndalmaǵan. Osydan keiin basqarma zańsyz nysandardy buzý týraly talap aryzben Almaty qalasynyń mamandandyrylǵan aýdanaralyq ekonomikalyq sotyna júgingen.
Almaty qalalyq soty birinshi satydaǵy sottyń zańsyz nysandardy buzý týraly sheshimin ózgerissiz qaldyrǵan. Is materialdary sot aktisin oryndaý úshin Ádilet departamentine joldanǵan.
Basqarmanyń habarlaýynsha, sot sheshimin oryndaý maqsatynda bazardyń menshik iesi buzý jumystaryn óz betinshe bastaǵan.
Osylaisha, tiisti ruqsatsyz salynǵany anyqtalǵan aýqymdy saýda nysanyn buzý protsesi bastaldy. Qazirgi ýaqytta basqarma usynǵan aqparatta jumystardyń aiaqtalý merzimi naqtylanbaǵan.
