Búgin QR Premer-Ministri Álihan Smaiylovtyń tóraǵalyǵymen kún saiynǵy formattaǵy Daǵdarysqa qarsy sharalar jónindegi jedel shtabtyń otyrysy ótti, dep habarlaidy QR Úkimetiniń baspasóz qyzmeti.
Otyrys barysynda qazaqstandyq júk tasymaldary salasynda týyndap otyrǵan logistikalyq máseleler boiynsha sheshimder qabyldandy. Atap aitqanda, QR indýstriia jáne infraqurylymdyq damý ministri Q. Óskenbaev sheteldik seriktestermen ótken kelissózder jáne qol jetkizilgen ýaǵdalastyqtar týraly baiandady.
«Elimizdiń tranzittik-logistikalyq áleýetin nyǵaitý úshin júk tasymaly, «Aqtaý/Quryq – Baký – Tbilisi – Kars» baǵyty boiynsha seriktestermen kelisimder pysyqtalyp jatyr. Sondai-aq tariftik saiasat máselesi de sheshimin tabýda», — dedi QR indýstriia jáne infraqurylymdyq damý ministri.
Sonymen qatar biznes, «Atameken» UKP jáne múddeli memlekettik organdar arasynda ózekti aqparatpen jedel almasý máselesi talqylandy. Osylaisha, qajetti málimetter bazasy bir júiege keltiriledi.
«Atameken» UKP tóralqa tóraǵasy R. Battalov Jedel shtabtyń kelesi otyrysynda qaraý úshin biznestiń usynystaryn daiyndaý barysy týraly aitty.
Premer-Ministrdiń tóraǵalyǵymen Jedel shtabtyń kelesi otyrysy biylǵy 7 naýryzda ótedi.
