Eskishe oilap, eskishe qimyldaityn, eskishe tanym-túisikpen eldiń rizyǵyn uialmai jeitin “kónekóz” sheneýniktermen qoshtasatyn ýaqyt jetti. Biz burynǵy júieniń qaida qoisa da sol salanyń kánigi mamany siiaqty istep kete beretin, sýǵa salsa batpaityn, otqa salsa janbaityn ýniversal ákim-ministrlerden qutylýymyz kerek.
Qazir bizge Memleket basshysyna nemese Elbasyna berilgen adam emes, rýshyldyqpen aýyrmaityn, taipalyq emes ulttyq deńgeide oilai alatyn, derbes sheshim qabyldai alatyn, halqyna adal, ultshyl hám memleketshil, ziiatker de imandy azamattar qajet. Ondai azamattar qazaqtyń ishinde molynan jetedi. Osy kúnge deiin bilik basynda júrgen qansha azamattar renjimesin, baǵyn synap kórdi, eńbegi de sińdi, abyroiyn da asyrdy, endi bólek oilai alatyn adamdarǵa ornyn bersin. Memlekettik qyzmet atadan qalǵan miras, ákeden qalǵan mura emes. Qazaqtyń topyraǵyna kindik qany tamǵan kez kelgen adamnyń osy eldiń taǵdyryna aralasýyna tolyq haqysy bar.
El Prezidenti Qasym-Jomart Toqaevtyń búgingi Úkimet otyrysynda ministrler kabinetine eskertý jasaǵany da biz aityp otyrǵan dúniege kóziniń jetkendiginen dep oiladyq. Bul kisini de túsinýge bolady. Ózgeris jasaiyn dese, ne bop keter eken dep eki jaqqa alańdap otyrǵan sheneýnikterdiń batylsyzdyǵy men baǵynǵysy kelmeitin qyrsyqtyǵy kedergi.
Tapsyrmalardyń deni aiaǵy sýǵa ketip jatyr, árkim óz basymen áýre. Shym-shytyryq intriga men bos sóz, áliptiń artyn baqqan baqa kózderdiń tirligi. Sosyn jasyryp jabary joq, kóbisiniń ishi de arty da taza emes. Qit etse, shetel asqaly otyr. Bárine topyraq shashpaiyq, biraq basym kópshiligi óziniń hám bala-shaǵasynyń bolashaǵyn bul elmen bailanystyrmaidy. Sondyqtan kekireie qaraidy, alshańdap basady. Eldiń bolashaǵyn oilaityn adamnyń kózinen de júzinen nur aǵyp tursa kerek. Bulardyń kózderi áinek siiaqty. Júrek qataiǵandyqtyń belgisi.
Eki aptada bul kisilerdiń tańǵajaiyp túrde ózderi de ózgerip, eldi de ózgerte qalatynyna senbeimin. Múmkin de emes. Jaǵdai bolsa mynaý. Jurt qoisha qyrylyp jatyr, ekonomika shatqaiaqtap tur. El ne isterin bilmei, teńselip tur. Dál osyndai almaǵaiyp ýaqytta jańa basshymyz batyl qimyldap, myqty komanda jinaqtap jiberip, bas-kózge qaramai, myna ańyraǵan eldi qatepti qara nardai alǵa súreýi kerek. Basqa bizge jol joq.
Aqberen Elgezektiń feisbýktaǵy jazbasynan
