ەسكٸشە ويلاپ, ەسكٸشە قيمىلدايتىن, ەسكٸشە تانىم-تٷيسٸكپەن ەلدٸڭ ريزىعىن ۇيالماي جەيتٸن “كٶنەكٶز” شەنەۋنٸكتەرمەن قوشتاساتىن ۋاقىت جەتتٸ. بٸز بۇرىنعى جٷيەنٸڭ قايدا قويسا دا سول سالانىڭ كەنٸگٸ مامانى سيياقتى ٸستەپ كەتە بەرەتٸن, سۋعا سالسا باتپايتىن, وتقا سالسا جانبايتىن ۋنيۆەرسال ەكٸم-مينيسترلەردەن قۇتىلۋىمىز كەرەك.
قازٸر بٸزگە مەملەكەت باسشىسىنا نەمەسە ەلباسىنا بەرٸلگەن ادام ەمەس, رۋشىلدىقپەن اۋىرمايتىن, تايپالىق ەمەس ۇلتتىق دەڭگەيدە ويلاي الاتىن, دەربەس شەشٸم قابىلداي الاتىن, حالقىنا ادال, ۇلتشىل ھەم مەملەكەتشٸل, زيياتكەر دە يماندى ازاماتتار قاجەت. ونداي ازاماتتار قازاقتىڭ ٸشٸندە مولىنان جەتەدٸ. وسى كٷنگە دەيٸن بيلٸك باسىندا جٷرگەن قانشا ازاماتتار رەنجٸمەسٸن, باعىن سىناپ كٶردٸ, ەڭبەگٸ دە سٸڭدٸ, ابىرويىن دا اسىردى, ەندٸ بٶلەك ويلاي الاتىن ادامدارعا ورنىن بەرسٸن. مەملەكەتتٸك قىزمەت اتادان قالعان ميراس, ەكەدەن قالعان مۇرا ەمەس. قازاقتىڭ توپىراعىنا كٸندٸك قانى تامعان كەز كەلگەن ادامنىڭ وسى ەلدٸڭ تاعدىرىنا ارالاسۋىنا تولىق حاقىسى بار.
ەل پرەزيدەنتٸ قاسىم-جومارت توقاەۆتىڭ بٷگٸنگٸ ٷكٸمەت وتىرىسىندا مينيسترلەر كابينەتٸنە ەسكەرتۋ جاساعانى دا بٸز ايتىپ وتىرعان دٷنيەگە كٶزٸنٸڭ جەتكەندٸگٸنەن دەپ ويلادىق. بۇل كٸسٸنٸ دە تٷسٸنۋگە بولادى. ٶزگەرٸس جاسايىن دەسە, نە بوپ كەتەر ەكەن دەپ ەكٸ جاققا الاڭداپ وتىرعان شەنەۋنٸكتەردٸڭ باتىلسىزدىعى مەن باعىنعىسى كەلمەيتٸن قىرسىقتىعى كەدەرگٸ.
تاپسىرمالاردىڭ دەنٸ اياعى سۋعا كەتٸپ جاتىر, ەركٸم ٶز باسىمەن ەۋرە. شىم-شىتىرىق ينتريگا مەن بوس سٶز, ەلٸپتٸڭ ارتىن باققان باقا كٶزدەردٸڭ تٸرلٸگٸ. سوسىن جاسىرىپ جابارى جوق, كٶبٸسٸنٸڭ ٸشٸ دە ارتى دا تازا ەمەس. قيت ەتسە, شەتەل اسقالى وتىر. بەرٸنە توپىراق شاشپايىق, بٸراق باسىم كٶپشٸلٸگٸ ٶزٸنٸڭ ھەم بالا-شاعاسىنىڭ بولاشاعىن بۇل ەلمەن بايلانىستىرمايدى. سوندىقتان كەكٸرەيە قارايدى, الشاڭداپ باسادى. ەلدٸڭ بولاشاعىن ويلايتىن ادامنىڭ كٶزٸنەن دە جٷزٸنەن نۇر اعىپ تۇرسا كەرەك. بۇلاردىڭ كٶزدەرٸ ەينەك سيياقتى. جٷرەك قاتايعاندىقتىڭ بەلگٸسٸ.
ەكٸ اپتادا بۇل كٸسٸلەردٸڭ تاڭعاجايىپ تٷردە ٶزدەرٸ دە ٶزگەرٸپ, ەلدٸ دە ٶزگەرتە قالاتىنىنا سەنبەيمٸن. مٷمكٸن دە ەمەس. جاعداي بولسا مىناۋ. جۇرت قويشا قىرىلىپ جاتىر, ەكونوميكا شاتقاياقتاپ تۇر. ەل نە ٸستەرٸن بٸلمەي, تەڭسەلٸپ تۇر. دەل وسىنداي الماعايىپ ۋاقىتتا جاڭا باسشىمىز باتىل قيمىلداپ, مىقتى كوماندا جيناقتاپ جٸبەرٸپ, باس-كٶزگە قاراماي, مىنا اڭىراعان ەلدٸ قاتەپتٸ قارا نارداي العا سٷرەۋٸ كەرەك. باسقا بٸزگە جول جوق.
اقبەرەن ەلگەزەكتٸڭ فەيسبۋكتاعى جازباسىنان
