QR Premer-ministriniń orynbasary – mádeniet jáne aqparat ministri Aida Balaevanyń tóraǵalyǵymen Qazaqstan Respýblikasy Prezidentiniń «Kitap oqý mádenietin damytý jáne zerdeli ult qalyptastyrý jónindegi sharalar týraly» Jarlyǵyn keshendi júzege asyrý máselesine arnalǵan keńes ótti. Jiynǵa oqý-aǵartý ministri Juldyz Súleimenova, Mádeniet jáne aqparat, Ulttyq ekonomika, Jasandy intellekt jáne tsifrlyq damý, Ǵylym jáne joǵary bilim, Qorǵanys, Ishki ister ministrlikteriniń ókilderi qatysty.
Keńes barysynda Premer-ministrdiń orynbasary qatysýshylardyń baiandamalaryn tyńdady. Mádeniet jáne aqparat vitse-ministri Rýstam Áli keshendi jospardyń negizgi baǵyttaryn tanystyrdy. Onyń ishinde kitaphana jáne kitap isin damytý, oqýdy nasihattaý, sondai-aq zamanaýi tsifrlyq infraqurylym qalyptastyrý jónindegi sharalar qamtylǵan.
Qujat 9 negizgi baǵyt boiynsha 50-ge tarta is-sharany kózdeidi. Solardyń qatarynda kitap salasyn quqyqtyq turǵydan júieleý máselesi de bar. Sonymen qatar Mádeniet jáne aqparat ministrligi kitaphana salasyn jańǵyrtýǵa erekshe kóńil bólip otyr. Búginde respýblikada 3 887 kópshilik kitaphana jumys isteidi. Olardyń jiyntyq qory 72,5 mln-nan astam saqtaý birligin quraidy. 2025 jyly kitaphanalarǵa kelýshiler sany rekordtyq kórsetkishke jetip, 57 mln-nan asty. Biyl 4 kitaphana jańǵyrtylyp, 6 jańa kitaphana ashyldy. Jyl sońyna deiin elimizdiń bes óńirinde taǵy 24 kitaphanany jańǵyrtý josparlanyp otyr.
Aida Balaeva kitaphanalardyń qyzmetine jan-jaqty taldaý júrgizýdi tapsyrdy. Bul jumys kitaphana infraqurylymy men ǵimarattarynyń jai-kúiin, kitap qorymen qamtamasyz etilý deńgeiin, sondai-aq ondaǵy ádebietterge suranysty qamtýy tiis. Taldaý qorytyndysy boiynsha, ásirese balalar men jastarǵa arnalǵan ádebiet baǵytyndaǵy tapshylyqtardy aiqyndap, kitaphana qoryn odan ári damytý jáne jańartý jóninde naqty usynystar ázirleý qajet. Balalar men jastar arasynda oqý mádenietin damytýǵa baǵyttalǵan sharalar týraly oqý-aǵartý ministri Juldyz Súleimenova baiandady. Ministrlik oqýshylardyń ádebietke jáne zamanaýi oqyrman servisterine qoljetimdiligin keńeitetin «Balalar kitaphanasy» jáne «Oqyrman» platformalaryn iske qosty. Bul baǵyttaǵy mańyzdy jumystyń biri – bilim berý uiymdarynda oqyrman klýbtarynyń qyzmetin damytý. Sonyń negizinde turaqty oqý mádenietin qalyptastyrýǵa baǵyttalǵan «Kitap oqityn mektep» biryńǵai modeli engiziledi. Atalǵan model aiasynda balalardyń kitap oqýǵa qyzyǵýshylyǵyn ata-analar men pedagogterdiń jeke ónegesi arqyly arttyrýdy kózdeitin «Birge oqiyq» jobasy júzege asyrylady.
Óz kezeginde ǵylym jáne joǵary bilim vitse-ministri Gúlzat Kóbenova stýdent jastar arasynda kitap oqý mádenietin ilgeriletý tásilderi týraly aitty. Bul baǵytta joǵary oqý oryndary kitaphanalaryn damytý jáne stýdenttik oqyrman klýbtarynyń jumysyn jandandyrý máseleleri qamtylǵan. Keńes qorytyndysy boiynsha Ǵylym jáne joǵary bilim ministrligine salalyq ádebiettermen qamtamasyz etý deńgeiine taldaý júrgizý, sondai-aq pedagog kadrlardy daiarlaýda qoldanylatyn oqý ádebietteriniń mazmunyn zerdeleý tapsyryldy.
Qorǵanys jáne Ishki ister ministrlikterine qarasty uiymdardyń kitaphana qorlaryn zertteý jáne taldaý máselesine de erekshe nazar aýdarý qajet. Áskeri bólimder men vedomstvolyq mekemelerdi zamanaýi, mazmundy ári kásibi ádebiettermen qamtamasyz etý mańyzdy. Taldaý nátijesinde naqty qajettilikter aiqyndalyp, kitaphana qorlaryn tolyqtyrý jáne jańartý jóninde usynystar ázirlenýi tiis.
