Premer-ministrdiń orynbasary - Qarjy ministri Erulan Jamaýbaev tanymal ekonomistiń sózin túsindirdi. Sarapshy infliatsiiany aýyzdyqtaýǵa is júzinde instrýment qalmaǵanyn aityp otyr, dep habarlaidy Sputnik Qazaqstan.
Buǵan deiin buqaralyq aqparat quraldarynda ekonomist Oljas Qudaibergenovtyń infliatsiiaǵa qatysty pikiri jariialanǵan bolatyn. Onyń aitýynsha, aldaǵy bir jyldyń ishinde infliatsiiany ustap qalýǵa múmkindik beretin instrýment qalmady.
Sebebi infliatsiianyń basym bóligi importtalyp jatyr, iaǵni, qymbat sheteldik taýarlarmen birge baǵa da ósip keledi. Qarjy ministri Erulan Jamaýbaev ony rastady. Biraq kelesi jyldyń basynda infliatsiianyń tómendeitinine sendirdi.
"Oljas Qudaibergenovtyń ritorikasyn túsindirip bereiin, biz de ony bilemiz, qazirgi kezde bizdegi infliatsiia, kórshiles elderdegi infliatsiia bolsyn, basqa memleketterdegi infliatsiia bolsyn - importpen bailanysty, iaǵni, qazir dúniejúzi boiynsha baǵa sharyqtap tur. Amerikada, Eýropalyq odaqta, olardaǵy infliatsiianyń óskeni sonsha, retsessiia bolýy múmkin degendi qarastyryp jatyr. Bul degenimiz, ekonomikalyq ósim bolmaýy múmkin. Sondyqtan ritorika nede? Árine, qazir Úkimettiń barlyq quraldary bar. Biraq ol quraldar nege tiimsiz bolyp otyr? Sebebi bul infliatsiia syrttan kelip jatqan faktorlarmen bailanysty", - dedi Jamaýbaev Senatta ótken brifingte.
Ministrdiń aitýynsha, "biz AQSh-taǵy infliatsiiany aýyzdyqtai almaimyz". Eýropalyq odaqtaǵy infliatsiiany da toqtatýǵa múmkindik joq. Oǵan qosa, olarǵa energetikalyq daǵdarys tónip tur.
"Degenmen, biz ulttyq bankpen birge jumys istep jatyrmyz. Qazirgi boljam boiynsha osy jyldyń aiaǵyna qarai, kelesi jyldyń basyna qarai infliatsiia tómendei bastaidy", - dep atap kórsetti Jamaýbaev.
Buǵan deiin ministr jyldyń sońynda infliatsiia sharyqtaý shegine jetetinin aitty. Onyń deńgeii, shamamen, 20 protsent bolady.
