پرەمەر-مينيستردٸڭ ورىنباسارى - قارجى مينيسترٸ ەرۇلان جاماۋباەۆ تانىمال ەكونوميستٸڭ سٶزٸن تٷسٸندٸردٸ. ساراپشى ينفلياتسييانى اۋىزدىقتاۋعا ٸس جٷزٸندە ينسترۋمەنت قالماعانىن ايتىپ وتىر, دەپ حابارلايدى Sputnik قازاقستان.
بۇعان دەيٸن بۇقارالىق اقپارات قۇرالدارىندا ەكونوميست ولجاس قۇدايبەرگەنوۆتىڭ ينفلياتسيياعا قاتىستى پٸكٸرٸ جارييالانعان بولاتىن. ونىڭ ايتۋىنشا, الداعى بٸر جىلدىڭ ٸشٸندە ينفلياتسييانى ۇستاپ قالۋعا مٷمكٸندٸك بەرەتٸن ينسترۋمەنت قالمادى.
سەبەبٸ ينفلياتسييانىڭ باسىم بٶلٸگٸ يمپورتتالىپ جاتىر, ياعني, قىمبات شەتەلدٸك تاۋارلارمەن بٸرگە باعا دا ٶسٸپ كەلەدٸ. قارجى مينيسترٸ ەرۇلان جاماۋباەۆ ونى راستادى. بٸراق كەلەسٸ جىلدىڭ باسىندا ينفلياتسييانىڭ تٶمەندەيتٸنٸنە سەندٸردٸ.
"ولجاس قۇدايبەرگەنوۆتىڭ ريتوريكاسىن تٷسٸندٸرٸپ بەرەيٸن, بٸز دە ونى بٸلەمٸز, قازٸرگٸ كەزدە بٸزدەگٸ ينفلياتسييا, كٶرشٸلەس ەلدەردەگٸ ينفلياتسييا بولسىن, باسقا مەملەكەتتەردەگٸ ينفلياتسييا بولسىن - يمپورتپەن بايلانىستى, ياعني, قازٸر دٷنيەجٷزٸ بويىنشا باعا شارىقتاپ تۇر. امەريكادا, ەۋروپالىق وداقتا, ولارداعى ينفلياتسييانىڭ ٶسكەنٸ سونشا, رەتسەسسييا بولۋى مٷمكٸن دەگەندٸ قاراستىرىپ جاتىر. بۇل دەگەنٸمٸز, ەكونوميكالىق ٶسٸم بولماۋى مٷمكٸن. سوندىقتان ريتوريكا نەدە? ەرينە, قازٸر ٷكٸمەتتٸڭ بارلىق قۇرالدارى بار. بٸراق ول قۇرالدار نەگە تيٸمسٸز بولىپ وتىر? سەبەبٸ بۇل ينفلياتسييا سىرتتان كەلٸپ جاتقان فاكتورلارمەن بايلانىستى", - دەدٸ جاماۋباەۆ سەناتتا ٶتكەن بريفينگتە.
مينيستردٸڭ ايتۋىنشا, "بٸز اقش-تاعى ينفلياتسييانى اۋىزدىقتاي المايمىز". ەۋروپالىق وداقتاعى ينفلياتسييانى دا توقتاتۋعا مٷمكٸندٸك جوق. وعان قوسا, ولارعا ەنەرگەتيكالىق داعدارىس تٶنٸپ تۇر.
"دەگەنمەن, بٸز ۇلتتىق بانكپەن بٸرگە جۇمىس ٸستەپ جاتىرمىز. قازٸرگٸ بولجام بويىنشا وسى جىلدىڭ اياعىنا قاراي, كەلەسٸ جىلدىڭ باسىنا قاراي ينفلياتسييا تٶمەندەي باستايدى", - دەپ اتاپ كٶرسەتتٸ جاماۋباەۆ.
بۇعان دەيٸن مينيستر جىلدىڭ سوڭىندا ينفلياتسييا شارىقتاۋ شەگٸنە جەتەتٸنٸن ايتتى. ونىڭ دەڭگەيٸ, شامامەن, 20 پروتسەنت بولادى.
