Biyl Reseide halyq sany 158 myńǵa azaiady. Bul - sońǵy 14 jyl ishindegi eń joǵary kórsetkish. Úkimettiń ulttyq maqsatqa jetý jobasyna silteme jasaǵan RBK saity osyndai boljam týraly jazdy. Sońǵy ret 2006 jyly halyq sany bir jylda 374 myńǵa kemip, rekordtyq kórsetkishke jetken edi.
RBK-nyń eki derekkózi rastaǵan resmi qujattaǵy málimetke sáikes, 2020 jyly Reseide halyq sany byltyrǵy jylmen salystyrǵanda bes esege azaimaq. Qańtar men maýsym aralyǵynda indet órship turǵan shaqta adam ólimi 3,1 paiyzǵa artqan, bala týý kórsetkishi 5,4 paiyzǵa tómendegen. Boljamǵa sáikes, epidemiiadan keiin Reseide 2022 jyldan bastap qana halyq ósimi baiqalýy múmkin.
2016 jyldan beri Reseide halyq sany jyldam azaiyp keledi, onyń basty sebebi bala týý kórsetkishiniń azaiýy dep aitylady. Migranttardyń kelýi de tabiǵi kemý kórsetkishiniń ornyn toltyra almaǵan. Elde bala týýǵa qabiletti áielder sany azaiǵandyqtan mamandar týý kórsetkishin arttyrýdy kózdeitin sharalardyń da múmkindigi shekteýli dep sanaidy.
Buǵan qosa, úkimet elde kedeilik kórsetkishi de ulǵaiady dep boljap otyr. 2020 jyly tabysy eń tómengi kúnkóris deńgeiinen az adamdar sany 13,3 paiyzǵa jetpek. Úkimet 2030 jylǵa deiin kedeilikti 6,5 paiyzǵa deiin azaitýdy kózdep otyr.
Rosstat málimetinshe, 2014-2017 jyldary halyqtyń shynaiy tabysy tómendegen, 2018 jyly 0,1 paiyzǵa ǵana kóbeigen.
Sberbank málimetinshe, 2020 jyly reseilikerdiń 2,5 paiyzy tabysynan tolyq aiyrylǵan, jumys isteitin árbir ekinshi adamnyń jalaqysy azaiǵan. NAFI analitikalyq ortalyǵynyń dereginshe, pandemiiaǵa deiin reseilikterdiń 45 paiyzynda qarjy qory qalmaǵan. Saýalnamaǵa qatysqandardyń 46 paiyzy qarjylai qiyndyqqa ushyraǵanyn aitqan.
