Kaspii teńizindegi qaiǵyly oqiǵadan aman qalǵan sarbaz Aqjol Temirhannyń anasy Samal Keýelova tragediiaǵa bir ai tolýyna bailanysty áleýmettik jelide áserli jazba jariialady, dep habarlaidy ult.kz.
Samal Keýelova jazbasynda osy ýaqyt ishinde jaqyndarynan aiyrylǵan otbasylardyń qaiǵysy basylmaǵanyn aityp, balasyn kútip otyrǵan ata-analardyń aýyr jaǵdaiyna toqtaldy.
Onyń sózinshe, bir ai keibir adamdar úshin kúntizbedegi ýaqyt ólshemi ǵana bolsa, qara jamylǵan otbasylar úshin ár kúni saǵynysh pen muńǵa toly kezeńge ainalǵan.
"Bir ai – ata-analar balalarynan aiyryldy. Bir ai – balasyn endi eshqashan qushaǵyna basa almaitynyn júregi qabyldai almai júrgen ata-analar. Bir ai – ulynyń áskerden oralmaitynyn túsinýge májbúr bolǵan analar. Bir ai – oryndalmai qalǵan armandar. Bir ai – qiranǵan úmitter. Bir ai – qara jamylǵan otbasylar. Bir ai – balasynyń esikten kirip kelýin áli de kútetin júrekter…", – dep jazdy ol.
Sarbazdyń anasy qaiǵyly jaǵdaidyń talai otbasynyń ómirin ózgertkenin jetkizdi. Sondai-aq uly Aqjoldyń aman qalǵanyna shúkirshilik ete otyryp, qaza tapqan sarbazdardyń ata-analaryna kóńil aitty.
"Bir ai ótti. Biraq júrektegi jaraǵa ýaqyttyń ózi de em bola almai turǵandai. Bireýlerdiń balasy úiine oraldy… Bireýlerdiń balasy máńgilikke saǵynyshqa ainaldy… Bir úide qýanysh, bir úide únsizdik… Bir ana balasyn qushaqtap otyr, endi bir ana balasynyń sýretin qushaqtap otyr…", – dedi Samal Keýelova.
Ol jazbasynda Aqjoldyń aman qalýy otbasyna úlken medeý bolǵanyn atap ótip, qaiǵyly oqiǵamen bailanysty Azamat pen 13 sarbazdy da eske aldy.
"Bireýdiń amandyǵyna shúkir etip, bireýdiń joqtyǵyna júrek syzdaidy. Bireýdiń oralǵanyna qýanyp, bireýdiń máńgilikke oralmaitynyna sengisi kelmeidi. Bir ai buryn bastalǵan bul qasiretti eshkim umytqan joq… Umytý múmkin de emes…", – dep jazdy ol.
Jazbasynyń sońynda Samal Keýelova ómirden ótken sarbazdardyń rýhyna duǵa baǵyshtap, olardyń jaqyndaryna sabyr tiledi.
"Alla taǵala perzentinen aiyrylǵan ata-analarǵa sabyr bersin… Jatqan jerleri jaily, topyraqtary torqa bolsyn, asyl balalar… Armandary ózderimen birge úzilgen bozdaqtardyń rýhy shat bolsyn. Bir ai. Biraq júrekter úshin bul – keshe ǵana bolǵan qaiǵy", – dep túiindedi sarbazdyń anasy.
