"Qazaqstan daýysy" jobasynyń alǵashqy maýsymynda jeńiske jetken ánshi Shaharizat Seidahmet uzaq jyldar boiy qumar oiynǵa táýeldi bolǵanyn moiyndady. Óner iesi "Köremiz show" baǵdarlamasynda osy ádetiniń kesirinen otbasynan aiyrylyp, keiin ońaltý ortalyǵynda em qabyldaǵanyn aitty, dep habarlaidy ult.kz.
Ánshiniń sózinshe, ol 10 jyl boiy qumar oiynnan aryla almaǵan. Ýaqyt óte kele táýeldilik jeke ómirine keri áser etip, otbasyndaǵy qarym-qatynastyń buzylýyna ákelgen.
Shaharizat Seidahmet 2025 jyldyń 17 naýryzynda jubaiymen resmi túrde ajyrasqanyn jetkizdi. Onyń aitýynsha, áieli uzaq ýaqyt boiy bul jaǵdaiǵa tózip kelgenimen, aqyrynda naqty tańdaý jasaýdy talap etken.
"Áielim sharshady, óziniń shekarasyn qoidy. “Ne meni, otbasyńdy tańda, ne óz nápsińdi tańda” dedi. Men aýyryp júrgen adammyn, nápsimdi tańdadym ǵoi, árine. Tákapparlyǵym jibermedi. Birdeńeni dáleldeý kerek degen siiaqty", – dedi ánshi.
Óner iesi táýeldiliktiń qanshalyqty qaýipti ekenin ýaqyt óte kele túsingen. Ol óziniń jaǵdaiyn alǵash ret anasyna ashyq aityp, jaqyndarynyń qoldaýyna súiengen.
Nátijesinde 2025 jyldyń 29 tamyzynda óz erkimen ońaltý ortalyǵyna baryp, arnaiy em qabyldaýǵa sheshim qabyldaǵan.
"Men 10 jyl qumar oiynda boldym. Táýeldi adamnyń ótetin tórt kezeńinen de óttim. Birinshisi – tanysý, odan keiin dos boldym, keiin qulyna ainaldym", – dep ótkenin eske aldy Shaharizat Seidahmet.
Ánshi suhbat barysynda qumar oiynǵa áýestiktiń birtindep táýeldilikke ainalǵanyn jáne odan shyǵý úshin kásibi kómekke júginýge týra kelgenin baiandady.
Ońaltý kýrsynan ótkennen keiin ol ómirin qaita qalypqa keltirýge kirisken. Baǵdarlama júrgizýshisi ánshiden burynǵy jubaiymen qaita tabysqan-tabyspaǵanyn surady.
"Iá. Qazir otbasym qasymda. Balalarym qasymda", – dep jaýap berdi óner iesi.
Osylaisha Shaharizat Seidahmet basynan ótkergen qiyndyqtaryn jasyrmai, táýeldilik saldarynan otbasynan aiyrylǵanyn, alaida keiin jaqyndarymen qaita qaýyshqanyn kópshilikke jetkizdi.
Shaharizat Seidahmet kim?
Shaharizat Seidahmet – qazaqstandyq ánshi, "Qazaqstan daýysy" mýzykalyq jobasynyń alǵashqy maýsymynyń jeńimpazy.
Ol 1986 jyly 12 qarashada Qostanai oblysy Amangeldi aýdanyna qarasty Úrpek aýylynda dúniege kelgen. 2004 jyly Jańaorda estetikalyq baǵyttaǵy orta mektebin támamdaǵan.
2008 jyly L.N. Gýmilev atyndaǵy Eýraziia ulttyq ýniversitetiniń dástúrli mýzyka óneri fakýltetindegi halyq áni mamandyǵy boiynsha bilim alǵan.
Óner jolyn Astana qalasynda túrli merekelik sharalarda án aityp, asabalyq qyzmet atqarýdan bastaǵan. 2013 jyly "Qazaqstan daýysy" jobasyna qatysyp, ánshi Nurlan Albannyń jetekshiligimen óner kórsetti. 2014 jyldyń qańtarynda kórermenderdiń daýys berý nátijesinde baiqaý jeńimpazy atanyp, 5 million teńge kóleminde syiaqy men Universal dybys jazý kompaniiasymen kelisimshart jasaý múmkindigine ie boldy.
Ol baiqaý barysynda qazaqtyń dástúrli ánderin oryndap, finalda "Saǵan, halqym" halyq ánin shyrqady.
2014 jyly "Maqpaljan" ánine alǵashqy beinebaianyn túsirip, shyǵarmashylyq jolyn jalǵastyrdy. Keiin "Bile, bile" ánine de beinebaian túsirip, dástúrli án men zamanaýi mýzykany ushtastyrýǵa den qoidy.
