Elimizde janar-jaǵarmai naryǵyna qoldaý kórsetilip, ony elden zańsyz áketýdiń jolyn kesý úshin tiisti sharalar qabyldanady. Bul týraly Premer-Ministr Álihan Smaiylov málim etti, dep habarlaidy QazAqparat.

«Janar-jaǵarmai naryǵyndaǵy jaǵdaidy turaqtandyrý úshin baǵa aiyrmashylyǵyn tómendetý kerek. Bul elden munai ónimderiniń jappai shyǵarylýyn azaitýǵa jáne ishki naryqty qamtamasyz etýge múmkindik beredi. Bizde budan basqa jol joq. Degenmen aýyl sharýashylyǵy taýaryn óndirýshilerge arzandatylǵan dizel tolyǵymen bólindi. Olarǵa baǵa 204 teńge kúiinde qala bermek», - dedi Álihan Smaiylov Úkimet otyrysynan keiin BAQ ókilderi aldynda málimdeme jasai turyp.

«Naýryz aiynyń ózinde janar-jaǵarmai tutyný kólemi ótken jylmen salystyrǵanda 15%-ǵa ósken. Eger respýblika baǵa aiyrmashylyǵyn qysqartpasa, onda biyl 850 myń tonnaǵa deiin kólemde janarmai tapshylyǵyna urynamyz. Sonymen qatar janarmai óndirýde ishki naryqty qoldaý jáne elden zańsyz áketýdiń jolyn kesý úshin tiisti sharalardy qabyldaimyz», — dep tolyqtyrdy Úkimet basshysy.