Foto: QR Prezidentiniń baspasóz qyzmeti
Úkimet aýyl sharýashylyǵy taýaryn óndirýshilerge qoldaý kórsetý úshin rezervten 30 mlrd teńge bóldi. Premer-Ministr Álihan Smaiylov tiisti qaýlyǵa qol qoidy, - dep habarlaidy "Ult aqparat" Úkimet basshysynyń baspasóz qyzmetine silteme jasap.
Bul shara mal ósirýshiler aldyndaǵy sýbsidiialar boiynsha bereshekti óteýge múmkindik beredi.
Qujatta Aýyl sharýashylyǵy ministrligine Abai, Jetisý, Aqmola, Almaty, Shyǵys Qazaqstan, Jambyl, Batys Qazaqstan, Mańǵystaý, Pavlodar jáne Soltústik Qazaqstan oblystarynyń biýdjetterine asyl tuqymdy mal sharýashylyǵyn damytý, ónimdilik pen ónim sapasyn arttyrýdy sýbsidiialaýǵa nysanaly transfertter túrinde 30 mlrd teńge bólý týraly jazylǵan.
"Osy qaýlynyń qosymshasyna sáikes, Aqmola oblysynyń ákimdigine eń kóp qarajat – 7,8 mlrd teńge bólindi. Jambyl oblysyna - 5 mlrd teńge, ShQO-ǵa - 4,5 mlrd teńge, BQO mal ósirýshilerine 1 mlrd teńge baǵyttaldy.
Aýyl sharýashylyǵy ministrligine qajetti sharalardy qabyldaý, al Qarjy ministrligine bólingen qarajattyń maqsatty paidalanylýyn baqylaý tapsyryldy.
Jalpy biyl agroónerkásip keshenin sýbsidiialaýǵa Úkimet barlyq kózderden 494 mlrd teńge bóldi. Jaqyn arada investitsiialyq sýbsidiialaýǵa jáne nesieler men lizing boiynsha paiyzdyq mólsherlemeni sýbsidiialaýǵa qosymsha 30 mlrd teńge bólý josparlanyp otyr" - delingen habarlamada.
