Úkimet rezervinen Astananyń injenerlik jáne energetikalyq infraqurylymyn damytýǵa 16,2 mlrd teńgeden astam qarjy bólindi. Bul týraly Úkimet habarlady, dep jazady ult.kz.
Tiisti qaýlylarǵa Qazaqstan Respýblikasynyń Premer-ministri Oljas Bektenov qol qoiǵan.
Úkimettiń málimetinshe, bólingen qarajattyń 8,7 mlrd teńgesi sý burý infraqurylymyn salý men jańǵyrtýǵa baǵyttalady. Joba aiasynda Astananyń Esil aýdanyndaǵy qoldanystaǵy tazartý qurylystarynan Aqmola oblysyndaǵy Qarabidaiyq kóline deiingi káriz kollektory qaita jańǵyrtylady. Sonymen qatar Uly Dala, Hýsein ben Talal, Shyńǵys Aitmatov kósheleri men Turan dańǵyly boiynan Esil ózenine deiin tazartylǵan aǵyn sýlardy aǵyzatyn jańa kollektor salynady.
Atalǵan jumystardyń nátijesinde 4,5 myń gektar aýmaqtaǵy jerústi jáne drenaj sýlaryn burý múmkindigi artyp, táýligine 70 myń tekshe metrge deiingi sýdy tazartatyn nysandardyń turaqty jumysy qamtamasyz etiledi. Bul elordanyń odan ári damýyna qajetti injenerlik infraqurylymdy qalyptastyrýǵa múmkindik beredi.
Sondai-aq 7,5 mlrd teńge Astananyń energetikalyq infraqurylymyn damytýǵa baǵyttalady. Bul qarajatqa qoldanystaǵy elektr jelilerine qosylatyn 110/20 kVt-tyq «Qarlyǵash» jabyq qosalqy stansasy salynyp, «Astana-Energiia» AQ-nyń JEO-2-degi №1 týrboagregaty jańǵyrtylady.
Jańa qosalqy stansa paidalanýǵa berilgennen keiin «Esil» jáne «Báiterek» qosalqy stansalaryna túsetin júkteme azaiyp, «Nurly jol» vokzaly mańy men Telman turǵyn alabyndaǵy shamamen 80 myń turǵyn turaqty elektrmen qamtamasyz etiledi. Budan bólek, qosymsha qýat jańa mektepter, emhanalar jáne basqa da áleýmettik nysandardy iske qosýǵa múmkindik beredi.
Úkimettiń málimetinshe, JEO-2-degi №1 týrboagregatty jańǵyrtý nátijesinde onyń elektr qýaty 30 MVt-qa artyp, 80 MVt-tan 110 MVt-qa deiin jetedi. Bul elordadaǵy elektr energiiasyna suranystyń jyl saiyn artýyna bailanysty energiiamen jabdyqtaý júiesiniń senimdiligin kúsheitýge yqpal etedi.
Jalpy, jobalardy iske asyrý qarqyndy turǵyn úi qurylysy men halyq sanynyń ósýi jaǵdaiynda káriz, jylý jáne elektrmen jabdyqtaý júieleriniń turaqty ári úzdiksiz jumysyn qamtamasyz etýge baǵyttalǵan.
