Ońtústik Qazaqstan oblysyndaǵy kieli jerlerdiń biri - Úkasha ata qabiri ornalasqan kesene. Onyń mazary Túrkistan qalasynan soltústikke qarai 35 shaqyrym jerde Babaiqorǵan aýylynyń soltústiginde ornalasqan. Keremetke toly qudyq pen sahabanyń qabiri jatqan kesene jaily ańyz-áfsana qazir kóptegen týristerdi qyzyqtyryp otyr.
Halyq arasyndaǵy ańyz boiynsha Úkasha ata Muhammed Paiǵambardyń (s.a.ý.) sahabasy retinde belgili. Mucylmandardyń áskeri qolbasshysy retinde keńinen taraǵan. Ańyz boiynsha, Úkasha ata shapsa qylysh, atsa oq ótpeitin qasiet daryǵan alyp deneli, batyr bolǵan eken. Úkasha sahaba sondai-aq qazaq dalasyna islam dinin alǵash alyp kelgen tarihi tulǵa retinde aitylady. Ol Paiǵambarymyzdyń (s.a.ý.) senimdi serikteriniń qatarynda bolǵan. Túrki taipalarynyń birinen shyqqan. Qazaq shejiresiniń bastaýynda turatyn Ánes sahabalarmen bir qatarda turady. Al keńestik dáýirde halyqtyń tarihi sanasynda Ǵakasha sahaba esimi umytylyp, Úkasha ata, Úkasha áýlie esimimen saqtalyp otyr.
Birqatar derekterde Ǵakasha sahabanyń eshqandai da ańyz emes ekeni aitylǵan. Ol Paiǵambardyń (s.a.ý.) jaqyn serigi, qasynda birge júrgen aiaýly sahabasy bolǵandyǵyn kórsetedi. Paiǵambar sahabasy - Áli Muhammed (s.a.ý.) aldynda júretin qorǵaýshysy bolsa, Úkasha ata onyń arqa tusynda júretin oqqaǵary bolǵan eken. Muhammed (s.a.ý) ómirden óter sátinde: «Kimde-kim Úkashanyń júzine qarasa, sol adamǵa tozaq oty haram bolady» degendi aitady. Endi bir derekte Múbárak áýlieniń qasietti qany aiaq asty bolmasyn degen oimen denesimen qosa qany shashyraǵan jeri kómilip qabirge ainaldyrylǵan.
Qazirgi tańda Úkasha ata qabiri búkil túrki jurty minájat qylyp, táýáp jasaityn ziiarat ornyna ainalǵan. Úkasha ata degende, eń áýeli jurttyń esine taý basyndaǵy qudyq eske túsedi. Taý basyndaǵy qudyqtyń paida bolýyna qatysty suraqtyń jaýaby da tarihi shyǵarmalardan alynǵan. Munda kelgen árbir adam birinshi Úkasha atanyń qabiri ornalasqan kesenege kirip, quran oqidy. Onan keiin baryp taý basyndaǵy qudyqtyń basynan sý alady. Keremetke toly qudyq pen sahabanyń qabiri jatqan kesene jaily ańyz-áfsana burnaǵy ýaqytta jyr-dastandar arqyly keńinen taralǵan. Tarihshy Muhtar Qoja Úkasha ata týraly mynandai derekter aitady.
«Úkasha atany jaý jeńe almaǵan, eshbir pendeniń oǵy ótpeidi, qylyshy kespeidi eken. Jaýlary aila jasap onyń áielin aldap sahabanyń osal jerin bilip alypty. Úkasha ata tek tań namazyn oqyǵan kezde qorǵansyz bolady eken. Ony bilgen kápirler tań namazyn oqyp otyrǵan kezde basyn qylyshpen shaýypty. Jansyz basty perishteler domalatyp qyrdyń etegine jetkizipti. Sol jer qaq aiyrylyp qudyq bolyp Úkasha ata basy oǵan túsip jer asty ózen arqyly Muhammed Paiǵambarǵa (s.a.ý.) jetipti. Sahabanyń qany tamǵan jerdiń betine sazdan uzyndyǵy 21 m belgi soǵylǵan. Ziiaratqa barǵandarǵa áýlieniń shyraqshylary Úkasha atanyń basy domalap túsken qudyqty, atanyń túiesiniń izi qalǵan tasty kórsetedi. Ziiaratshylar osy qudyqqa kezekpen shelek salyp sý alýǵa áreket etedi. Sý bireýlerge beriledi, bireýlerge qansha márte shelek salǵanymen bir tamshy sý ilinbeitini bar. Muny shelek tastap otyrǵan adamnyń kúnásine balap túsindiredi», - deidi tarihshy.
Al keibir derekterde Úkasha ata beiitiniń janyndaǵy qasietti sanalatyn qudyq sýy jer asty arqyly Mekkedegi Zámzám bulaǵymen bailanysady degen túsinik bar. Onyń tereńdigi 22-25 metrdi quraidy. Qudyq tik emes, spiral tárizdi. Qudyqtan sý alý úshin shelek salǵanda sý shyǵatyn bolsa, ol adamnyń joly bolǵysh, baqytty adam dep sanalady. Osy qudyqtyń basyna barsha musylman jamaǵaty Alladan tilek tilep, kúnálarynan arylýǵa ziiaratqa aǵylyp kelip jatady. Sondai-aq el arasynda jaýgershilik zaman men bertin kele soǵystan keiingi jyldary da jaralanǵan adamdamdar osy qudyqtyń sýyna shomylyp, aiyǵyp ketkeni týraly aitylady.
Kesene men qudyqtyń eki arasy shamamen alǵanda bir shaqyrymdai. 1990 jyldary aýyl aqsaqaldarynyń kúshimen ol jer qaita jóndelip, táýbe etetin orynǵa ainaldyryldy. 1996 jyly oblystyq Mádeniet basqarmasynyń «Áziret Sultan» mýzeii qarmaǵyna berildi.
