21-22 sáýirde QR Tótenshe jaǵdailar ministri Iýrii Ilin Aqmola jáne Soltústik Qazaqstan oblystarynyń sý tasqyny qaýpi bar ýchaskeleri men eldi mekenderine aerovizýaldy baqylaý júrgizdi. Bul týraly atalmysh vedomostvonyń baspasóz qyzmeti habarlady.
Qaýipti aimaqtardy áýeden baqylaý jumystaryna TJ vitse-ministri Marat Kúldikov, Aqmola jáne Soltústik Qazaqstan oblystary TJ departamentteriniń basshylary, ákimderiniń orynbasarlary men buqaralyq aqparat quraldarynyń ókilderi qatysty.
Ushý barysynda Aqmola oblysynyń Tselinograd, Astrahan, Atbasar, Sandyqtaý, Zerendi aýdandarynyń jáne Soltústik Qazaqstan oblysynyń Aiyrtaý, Esil, Aqqaiyń, Taiynsha, Esil, Ǵ.Músirepov, Shal aqyn aýdandarynyń sý tasqyny qaýipti ýchaskeleri men eldi mekenderi tekserildi. Esil jáne Jabai ózenderiniń arnasyn boilai ushqan arnaiy top Aqmola jáne Soltústik Qazaqstan oblystaryndaǵy sý tasqyny qaýpi edáýir seiilgenin kórdi.
«Aqmola oblysynyń aýmaǵynda josparly ushý sý tasqyny jaǵdaiy qalypty ekenin kórsetti. Jalǵyz qaýip Kolýton ózeniniń kei bólikterinde baiqalady. Munda bir apta boiy sý deńgeii kóterilgen. Qazir tómendeýde. Shamamen 10-14 kúnnen keiin jaǵdai qalpyna kelýi tiis», - dedi Iýrii Ilin.
Óz kezeginde Aqmola oblysy ákiminiń orynbasary Ǵalymjan Ábdiqalyqov barlyq ózenderde sýdyń tómendeýi baiqalatynyn jáne sý aidyndary óz arnalaryna kirgenin aitty.
Sonymen qatar Iýrii Ilin áýeden baqylaý barysynda orman paidalanýshylary men sharýa qojalyqtary Aqmola jáne Soltústik Qazaqstan oblysynyń keibir aýdandarynda orman alqaby mańyndaǵy qurǵaq shópti josparly órteý jumystaryna kiriskenin eskertti.
Ministrdiń sózinshe, kóktemde bul jumystar kóbinese baqylaýsyz júrgiziledi jáne iri órtterdiń týyndaýyna sebep bolady. Olar bul jumystardy qar eri salysymen bastap ketedi. Alaida qurǵaq shópti jaǵý jumystary júrgizilgen jaǵdaida, sharýalar TJ departamentterine habarlasýy tiis. Bul fakt teris saldarǵa ákep soqtyrmas úshin aldyn ala eskertý qajet.
Kelesi baǵyt Soltústik Qazaqstan oblysynyń aýmaǵynda ótti. Ushý barysynda Esil ózeni arnasynyń tómengi jaǵynda sý deńgeii kóterilip, sý ózen boiyn toltyratyny anyqtaldy. Qazirgi ýaqytta sý tasqyny Esil aýdanynyń Pokrovka aýylynyń mańynda ótýde. Sý deńgeiiniń kóterilýi shekti belgilerge jetken joq. Ózen arnasy taza, muz qubylystary baiqalmaidy.
Is-shara sońynda ministr Aqmola jáne Soltústik Qazaqstan oblystaryndaǵy sý tasqyny jaǵdaiyn baqylaý boiynsha birqatar tapsyrma berdi.
