Almaty oblysynyń ákimi Qanat Bozymbaev jýrnalisterge brifing barysynda 4 qańtarda Taldyqorǵandaǵy alańda nelikten bylapyt sóz aityp jibergenin túsindirdi, - dep habarlaidy Tengrinews.kz.
Bozymbaevtyń sózinshe, sol kúni aitylǵan sóz barlyq adamǵa arnalmaǵan, aimaq basshysyn arandatyp jibergenderge aitylǵan sóz.
"Halyq bir, bir jarym saǵat kóleminde talaptaryn aitty, al men sóilei bastaǵan kezde bir-eki jigit - arandatýshylar aiǵailai bastady. Men ashýlanyp, bireýine aiǵailap jiberdim", - deidi ol.
Oblys basshysy birden mikrofondy alyp, halyqtan keshirim suraǵanyn aitady. Bozymbaevtyń sózinshe, "halyq ony 100 paiyz keshirgen".
"Men de neshe túrli sóz estidim. Sondyqtan bul jerden úlken problema shyǵarýdyń qajeti joq. Ol isime ókinbeimin. Bastysy 4 qańtarda qantógis bolmady. Men sóiledim, aiǵailap ta aldym, maǵan da aiǵailady, bárin túsindirdim, Mádeniet saraiyna aparyp tehnika berdim, olarmen bir sýdy ishtim, qushaqtastyq. Bastysy - eshkim politsiiamen jaǵa jyrtyspady, qantógis bolmady. Al basqa nársege nazar aýdarmadym", - dedi Bozymbaev.
