Oblysta kadr tapshylyǵyn sheshý úshin árbir aýdan, qaladaǵy eldi-mekennen qyzmettik turǵyn úi salý qajet. Bul týraly búgin Ońtústik Qazaqstan oblysynyń ákimi J.Túimebaev selektorlyq jiynda aityp, tiisti sala basshylaryna tez arada qolǵa alýdy tapsyrdy, dep habarlaidy "Ult aqparat" aimaq basshysynyń baspasóz qyzmetine silteme jasap.
Aýdan, qala ákimderi men basqarma basshylarynyń qatysýymen ótken májiliste shalǵai eldi mekenderde ómir súrip, memlekettik jáne biýdjettik salada oryn alatyn kadr jetispeýshiligi máselesi men onyń sheshý joldary qaraldy.
Sapaly kadr daiyndaý zaman talaby ekenin aitqan aimaq basshysy árbir qyzmetkerge barynsha jaǵdai jasaý qajettigin jetkizdi.
«Bilikti kadrdy jumysqa alý úshin oǵan, eń aldymen, úi máselesin sheship berýimiz kerek. Sondyqtan, Ońtústiktegi árbir aýyldyq okrýgten 20 páterli eki qabatty, al aýdan ortalyǵynan 30-40 páterli kópqabatty tiptik úlgidegi turǵyn úi salýdy biylǵy jyldan qalmai qolǵa alýdy qurylys basqarmasyna tapsyramyn. Osy arqyly biz maman tapshylyǵyn joiyp, sapaly kadrǵa qol jetkizemiz dep oilaimyn. Munan bólek, jumystyń sapasyn arttyryp, bilikti kadrlar daiyndaý úshin rotatsiialaý tetigi arqyly oblys boiynsha mamandardy ózge aýdandarǵa jumysqa jiberý tiimdi ádis bolyp tabylady», - dedi ákim.
Sonymen qatar, óńir basshysy turǵyn úi salý arqyly aýdan ákimderiniń indikatorlyq kórsetkishin baǵalaitynynda atap ótti.
Jiynda sóz alǵan oblystyq bilim basqarmasynyń basshysy Isatai Saǵyndyqov óńirdegi 15 aýdan, qala ákimdikterinen jáne salalyq basqarmalardan 87 mamandyq boiynsha 14374 orynǵa suranys kelip túskenin málim etti.
«Jas mamandardyń kóptep aýyldarǵa oralýy, memleket tarapynan iske asyrylyp jatqan «Jastar praktikasy» men «Diplommen aýylǵa» baǵdarlamalarynyń nátijesinde aýyldyq jerlerde kadr jetispeýshiligi oń sheshimin tabýda desek te bolady. Alaida shalǵai jerlerde ornalasqan mektepterdegi maman tapshylyǵy áli de ótkir máselelerdiń qatarynda. Máselen, oqý júktemesiniń az bolýy, turǵyn úi máselesiniń sheshilmeýine bailanysty pedagogtar aýyldarǵa barǵylary kelmeidi», - dedi basqarma basshysy.
Al densaýlyq saqtaý salasyndaǵy maman tapshylyǵy men turǵyn úimen qamtý máselesi aiqyn. Máselen, basqarma basshysy Muqan Egizbaevtyń málimetinshe, 2007-2016 jyldar aralyǵynda densaýlyq saqtaý basqarmasy 1085 jas mamandy aýyldyq jerlerge jumysqa ornalastyrsa, aýyl ákimshiligi tarapynan 293 jas maman turǵyn úimen qamtylǵan. Al dál qazirgi tańda densaýlyq saqtaý basqarmasyna qarasty meditsinalyq uiymdarda jalpy 265 maman, onyń ishinde 157 maman aýyldy jerge qajet. Sondai-aq, oblystyń bas dárigeri aýyldy jerlerde jumys atqaryp otyrǵan 180 maman turǵyn úige muqtaj ekenin aityp, dese de memleketten jas mamandarǵa birshama qoldaý kómek berilip jatqanyn málimdedi.
«Jas mamandarǵa oblystyq biýdjetten 100 myń teńge mólsherinde aqshalai ótemaqylar men tólemder tólenip kelgen. Endi, Sizdiń bastamańyzben aýyldyq jerge joldanatyn ár mamanǵa bir rettik 1 million teńge tólenedi jáne 5 jyl ishinde qaityp ketken jaǵdaida jas maman biýdjetke qaitarý kerek bolady. Mundai tyń joba elimiz boiynsha Ońtústik Qazaqstanda alǵash bolyp júzege asyrylyp otyr», - dedi M.Egizbaev.
Osy rette, oblys ákiminiń eldi mekenderde kóp qabatty turǵyn úi salý ideiasy joǵaryda aitylǵan máselelerdiń ret-retimen sheshilýine muryndyq bolary sózsiz.
Selektorlyq jiynnyń kún tártibinde qaralǵan kezekti taqyryp - jergilikti atqarýshy organdar qyzmetiniń tiimdiligin baǵalaý nátijeleri boldy. Onda ákim barsha memlekettik qyzmetkerler men aýdan,qala ákimderine jáne basqarma basshylaryna ádep normalaryn saqtaýdy basshylyqtan bastaýdy tapsyrdy.
