QR Ulttyq ekonomika birinshi vitse-ministri Timýr Jaqsylyqov ekonomikada tutynýshylyq taýarlardyń importyn almastyrý úshin qandai qadamdar iske asyrylatynyn aitty, dep habarlaidy QazAqparat.
«Bizdiń tarapymyzdan ekonomika baǵamdyq táýekelderden qorǵalýy úshin ne istei alamyz? Bul turǵyda ulttyq ekonomikany damytyp, importty almastyrýǵa ekpin qoiylýy tiis. Bizde valiýta baǵamynyń aýytqýy kimderge áser etip otyr? Bul qubylmalylyq negizinen tutynýshylyq taýarlarǵa yqpal etýde. Osy oraida azyq-túlikke de qatysty. Bizde tutynýshylyq taýarlardyń eleýli importy bar, onyń ishinde Reseiden keledi», - dedi Jaqsylyqov Májiliste tilshiler saýalyna jaýap bere otyryp.
Osy oraida ol Qazaqstannyń ishinde jeke óndiristiń esebinen bul ónimderdi naqty usyný baǵytyn damytý kerek ekenin atap ótti.
«Bul rette bizde infliatsiiaǵa qarsy jospar qabyldandy. Sonymen qatar, halyqtyń tabysyn arttyrý baǵdarlamasy daiarlanyp jatyr. Osy eki baǵdarlama aiasynda otandyq óndiristerdi sýbsidiialaý men otandyq ónimdi arttyrý úshin tiisti sharalar qabyldanady. Birinshi kezekte, aýyl sharýashylyq sýbsidiialary arqyly azyq-túlik ónimine ekpin qoiylmaq.
Ónim jetkilikti kólemde paida bolýy úshin basqa da yntalandyrý is-sharalary iske asyrylady. Taýar ishki naryqta jetkilikti kólemde bolsa, kórshiles elderden infliatsiia importynan tiisti deńgeide qorǵalǵanymyzdy aita alamyz. Bul jumystar bastaldy», - dedi vitse-ministr.
