Búginde Tursynǵali Alagózovtiń esimi kópshilikke "Maxi Chai" brendimen jaqsy tanys. Alaida kásipkerdiń qazirgi aktivteri bir ǵana sýsyn óndirisimen shektelmeidi. Onyń biznes portfelinde alkogolsiz sýsyndar óndirisi, Shymkent syra zaýyty, un men makaron ónimderin shyǵaratyn JFood Kazakhstan bar. Al 2026 jyly osy óndiristik aktivterdi bir ortalyqqa biriktirý úshin Baiuly Capital holdingi quryldy, dep habarlaidy ult.kz.
Forbes Kazakhstan 2026 jylǵy mamyrda Alagózovtiń dáýletin 160 mln dollarǵa baǵalap, Qazaqstannyń eń aýqatty 75 kásipkeri reitinginde 58-orynǵa ornalastyrdy. Bir qyzyǵy, osy deńgeige jetken kásipkerdiń joly úlken zaýyttan nemese qomaqty investitsiiadan emes, qarapaiym aýyz sýyn úi-úige tasýdan bastalǵan.
Bári "Hrýstalnaia" sýynan bastaldy
Tursynǵali Alagózovtiń kásipkerlik tarihynyń bastaýyn 1998 jyldan izdeý kerek. Sol kezde Galanz Bottlers kompaniiasynyń negizi qalanyp, kásipker «Hrýstalnaia» aýyz sýyn óndirý jáne jetkizýmen ainalysa bastaidy. Kompaniianyń resmi tarihynda da 1998 jyl biznestiń bastalǵan kezeńi retinde kórsetilgen.
Alagózov keiin alǵashqy kezeń týraly esteliginde jumystyń basym bóligin ózi atqarǵanyn aitqan. Sýdy ózi quiyp, bótelkelerdi jýyp, tapsyrys berýshilerge óziniń kóligimen jetkizgen. Alǵashqy aida birneshe júz bótelkeden bastalǵan saýda birtindep myńdaǵan bótelkege deiin ósken.
2012 jyly The Business Year basylymyna bergen suhbatynda kásipker bastapqy biznestiń quny shamamen 15 myń dollar bolǵanyn aitqan. Alǵashqy óndiris úshin 100 bótelke men saǵatyna 200 litr sýdy tazalai alatyn shaǵyn jabdyq satyp alynyp, ǵimarat jalǵa alynǵan.
Osylaisha keiin júzdegen million dollarǵa baǵalanǵan biznestiń irgetasy óte shaǵyn óndiristen qalandy.
Qytaidaǵy sýsynnan týǵan "Maxi Chai"
Alagózov biznesindegi eń mańyzdy betburys 2000-jyldardyń basynda boldy.
Kásipker Qytaiǵa barǵan saparlary kezinde salqyndatylǵan jasyl shai iship, mundai ónimniń Qazaqstan naryǵynda joqtyǵyna nazar aýdarady. Sodan keiin osy formattaǵy sýsyndy elde óndirý ideiasyn qolǵa alady.
Biraq ideiany iske asyrý ońai bolmaǵan. Alagózovtiń aitýynsha, qajetti tehnologiiany meńgerý úshin Qytaiǵa jylyna birneshe ret baryp, bótelke, shikizat, shai ekstraktileri men óndiris tehnologiiasyn zerttegen. Qytailyq tehnologtarmen bailanys ornatyp, qajetti jabdyqqa kelisim jasaǵan.
Nátijesinde 2004 jylǵy 24 maýsymda alǵashqy «Maxi Chai» bótelkesi shyǵaryldy. Kompaniianyń resmi tarihy da brendtiń óndirisi 2004 jyly bastalǵanyn kórsetedi.
Alǵashqy ónim minsiz bolmaǵan. Kásipkerdiń óz esteligine qaraǵanda, bastapqy partiianyń dámi men óndiris tehnologiiasyn jetildirýge týra kelgen. Keiin assortiment keńeiip, jasyl shai men limon sekildi dámder paida boldy.
Dál osy ónim keiin Galanz Bottlers biznesiniń negizgi qozǵaýshy kúshteriniń birine ainaldy.
45 mln eýrolyq jańa zaýyt
Suranysty óteý úshin Almatinskoi oblysynyń Baiserke aýylynda jańa iri óndiris orny salyndy.
Forbes Kazakhstan dereginshe, kásiporynnyń aýmaǵy shamamen 55 myń sharshy metrdi quraidy. Alagózov jańa zaýytqa salynǵan jalpy investitsiia kólemin 45 mln eýro dep baǵalaǵan. Bul somaǵa jer satyp alý, qurylys, jabdyqtar, energetikalyq infraqurylym jáne óndiristik qýattardy damytý shyǵyndary kirgen.
Kásipkerdiń aitýynsha, investitsiianyń shamamen 60%-y kompaniianyń óz qarajatynan tólenip, qalǵan bóligi jabdyq jetkizýshilermen jasalǵan paiyzsyz bólip tóleý kelisimderi arqyly qarjylandyrylǵan. Iaǵni bul joba úshin bank nesiesi tartylmaǵan.
Bir óndiristik jeliniń qýaty jylyna 350 mln litrge deiin jetýi múmkin. Qosymsha jeliler iske qosylǵan jaǵdaida jalpy áleýetti qýat jylyna 1,2 mlrd litrge deiin jetkizý kózdelgen.
Osy tusta Alagózovtiń biznes modeliniń taǵy bir sipaty kórinedi: daiyn ónim satýdan túsken qarajattyń bir bóligi qaitadan óndiristik qýatty arttyrýǵa baǵyttalady.
Alagózov 2025 jyldyń sońynda úsh negizgi baǵyttaǵy kásiporyndarda shamamen 5 myń adamjumys isteitinin aityp, mundai aýqymda ár protsesti ózi baqylaý múmkin emes ekenin túsindirgen. Sondyqtan aktivterdi klassikalyq holding úlgisine kóshirý týraly sheshim qabyldandy.
Osylaisha sýsyn, syra jáne azyq-túlik óndirisin bir basqarý júiesine biriktirý ideiasy paida boldy.
Aita keteiik, Prodiýser Baian Alagózova jýrnalist Aman Tasyǵanǵa bergen suhbatynda jubaiy Tursyn Alagózovtiń burynǵy áielimen qarym-qatynasy týraly aitty.
