Qazaqstan sottalýshylardy ustaýdyń kameralyq rejimine kóshýdi josparlap otyr. Bul týraly QR Ishki ister ministrligi Qylmystyq atqarý júiesi komitetiniń tóraǵasy Janat Eshmaǵambetov aitty, dep habarlaidy QazAqparat.
«Mekemeler negizinen ótken ǵasyrdyń 30-shy, 50-shi jyldarynda salynǵan. Olardyń kópshiligi tehnikalyq turǵyda eskirgen. Qylmystyq atqarý júiesindegi negizgi problemalardyń biri - bul ustaýdyń otriadtyq baraktyq júiesi. Iaǵni, bir bólmede 100-200 sottalýshy ustaldy. Mundai jaǵdaida qandai da tárbielik sharalar qoldaný óte qiyn. Sottalýshylar osylai kóp shoǵyrlanǵanda qylmystyq ortanyń birneshe bedeldisi ǵana sottalýshylardyń zańǵa moiynsunatyn negizgi bóligine teris yqpal ete alady. Aldyńǵy qatarly álemdik tájiribege orai, biz ustaýdyń kameralyq rejimine kóshýdi josparlap otyrmyz. Onda bir kamerada 6-dan artyq sottalýshy bolmaidy», - dedi komitet tóraǵasy Ishki ister ministrligi alańynda ótken baspasóz máslihatynda.
Onyń dereginshe, elimizde otriadtyq baraktyq júiedegi 8 mekeme bar. Olarda shamamen 4 myń adam jazasyn ótep jatyr.
«Eń aldymen qoldanystaǵy ǵimarattary men qurylǵylaryn jańǵyrtý qajettiligi bar 6 mekemeni aiqyndap aldyq. Qazirgi ýaqytta tehnikalyq-ekonomikalyq negizdemesi, jobalyq-smetalyq qujattamasy ázirlengen. Olardyń qurylysýy qarjylandyrýǵa jáne ekonomikalyq ahýaldyń munan ary damýyna tikelei bailanysty», - dedi Janat Eshmaǵambetov.
