Eks-vitse-ministr Elmira Sýhanberdievaǵa qamaýda otyrǵan kezinde kitap jazǵanyn aitty, dep habarlaidy "Ult aqparat".
«Osy ótken 34 kúnde kitap jazdym, «Túrme vitse-ministrdiń kózimen» atty kitap jaqyn arada jaryqqa shyǵady. Onda áielderdiń abaqtydaǵy jaǵdaiy baiandalady. Kitapta kóptegen pikirler qamtylady, oqyrman qaýymǵa qyzyqty bolady dep oilaimyn. Onda tek ózim jaily avtobiografiia ǵana emes, sonymen qatar jalpy máseleler jazylady», - dedi burynǵy vitse-ministr.
Onyń sózine qaraǵanda, atalǵan kitap tolyǵymen jazylyp shyqty, endi shamaly túzetýler engizý qajet. Osy oraida kitapty jaryqqa shyǵarýǵa nietti baspalar bailanysqa shyqqan.
«Bul turǵyda keiinirek baspasóz máslihatyn ótkizemin. Sizderge bul kitapty syiǵa tartamyn», - dedi E. Sýhanberdieva tilshilerge qarata aitqan sózinde.
Aita keteiik, búgin elordada QR Bilim jáne ǵylym vitse-ministri bolǵan Elmira Sýhanberdievaǵa qatysty sot úkimi shyqty.
Oǵan 2500 AEK kóleminde aiyppul taǵaiyndaý sheshimi shyǵaryldy. Jalpy, ol 6 312 500 teńge teńge tóleýge mindetteldi. Sonymen qatar, ómir boiyna memlekettik qyzmette, sotta, Ulttyq bankte, jergilikti ózin-ózi basqarý organdarynda jáne memleket úlesi 50% asatyn ózge de memlekettik organdarda - ulttyq holdingter, ulttyq damý institýttarynda jumys isteý quqyǵynan aiyryldy.
Budan buryn habarlanǵandai, Elmira Sýhanberdieva sybailas jemqorlyq kúdigimen ustaldy jáne 2 aiǵa qamaýǵa alyndy.
9 shilde kúni sot otyrysy ótip, ol óz kinásin moiyndady.
