Qazaq halqynyń uly aqyny Abaidyń 175 jyldyq mereitoiyn Qazaqstanmen birge baýyrlas elder de atap ótýde. Mereitoi aiasynda túrkiialyq ánshi Aiben Ersoi Abaidyń ánin shyrqap, klip túsirdi, dep habarlaidy QazAqparat.
«Biylǵy maýsym aiynda Qazaqstannyń astanasynda qazaq dostarymyzdyń uly aqyny Abaidyń 175 jyldyǵy qurmetine festival uiymdastyrý josparlanǵan edi. Shart boiynsha, árbir elden kelgen qatysýshylar uly aqynnyń bir ánin shyrqaýy kerek edi. Biz de Abaidyń «Kózimniń qarasy» atty týyndysyn zamanaýi aranjirovkada ázirledik. Ótken aptada Ystanbuldyń eń kórikti jerleriniń biri – Sultan Ahmet meshiti mańynda klip túsirdik. Ókinishke qarai, qaýipti virýstyń taralýyna bailanysty bul joba toqtatyldy. Alaida biz bastaǵan isimizdi aiaqtap, týyndyny sizdermen bólisýdi jón kórdik», - dep jazdy túrkiialyq ánshi Instagram-daǵy paraqshasynda.
Sonymen birge, ánshi QazAqparat tilshisine bergen suhbatynda qazaq ánimen qalai tanysqanyn aityp berdi.
«Qazaqstanǵa túrli jobalar boiynsha birneshe ret barǵanmyn. Qazaqstan arnasy ótkizgen «Silk Way Star» baiqaýynyń qazylar alqasyna múshe boldym. Bul keremet joba boldy. Onda tek kamera aldynda ǵana emes, sahna syrtynda da baýyrlarymmen umytylmas sátter ótkizdim. Sol kezderi qazaq mýzykasyn estip, bizdiń halyq ánderimen uqsas ekenin ańǵardym. Qazaq mýzykasymen tanysqan kúni eki halyqqa da osy sezimdi jetkizip, erteden ulan-ǵaiyr aýmaqta tamyrymyzdyń ortaq bolǵanyn eske salǵym keldi. «Kózimniń qarasy» da alǵash estigen sátte-aq júregime jetti. Bastapqyda sózderdi túsinbesem de, ánniń ne týraly ekenin sezingendeimin. Sondyqtan men úshin Abaidyń osy ániniń orny bólek», - dedi A. Ersoi.
Qazir Aiben hanym Qazaqstan syndy ózge de baýyrlas halyqtardyń ulttyq ánderimen tanysýǵa múmkindik beretin jobalardy josparlap júr.
«Bizdiń álem ainalamyzdaǵy nárseni tez ózgertip jatqanyna qaramastan, bizdiń ishimizde óte qundy negiz bar. Biz – kún saiyn ózimizdi jańa deńgeige kóteretip, úzdiksiz damityn jaratylyspyz jáne kún saiyn ózimizdi jańa qyrymyzdan tanimyz. Jańa baǵytqa umtyla otyryp, biz Abai siiaqty qundy negizderdi bolashaqqa jetkizýimiz kerek. Abai syndy tulǵalar álemdi jaqsylyqqa bastaý úshin týady. Álemdegi beibitshilik pen mahabbat úshin uly aqynnyń mereitoiymen quttyqtaimyn», - dedi Aiben Ersoi.
