Aqordada ustazdardyń kásibi merekesine orai saltanatty is-shara ótti. Onda Prezident Qasym-Jomart Toqaev: «Kitap oqý – jastardy ústirt oilaýdan jáne aqparat tasqynyna jutylyp ketýden saqtap qalatyn rýhani qalqan» dep aitty, dep habarlaidy ult.kz.
Prezident ótken aptada Astanada jasandy intellekt taqyrybyna arnalǵan aýqymdy is-sharalar ótkenine toqtaldy.
«AI & Digital Bridge – 2026 forýmy, sondai-aq belgili mamandar men sarapshylardyń qatysýymen Jasandy intellektini damytý jónindegi keńestiń otyrysy boldy. Osy otyrysta Qazaqstannyń asa mańyzdy salada mol tabysqa jetkeni atalyp ótti. Biraq bul jaibaraqat otyrýǵa bolady degen sóz emes. Sebebi jasandy intellekt pen jańa tehnologiialar óte joǵary qarqynmen damyp jatyr. Bul – ýaqyt talaby. Budan bólek, elordamyzda tuńǵysh ret Astana AI Film festivali ótti. Shyn máninde, bul – naǵyz ozyq innovatsiialyq is-shara dep aitýǵa bolady. Óitkeni dál osy óte ózekti jáne mańyzdy shara aiasynda Astana qalasynda álemde alǵash ret jasandy intellektiniń kino ónerindegi kórinisi paida boldy. Basqasha aitsaq, atalǵan festival burynnan qalyptasqan dástúrli kino óndirisiniń ózektiligi azaia bastaǵanyn kórsetti. Endi film túsirýmen ainalysatyn mamandar sheneýnikterdiń, demeýshilerdiń jáne prodiýserlerdiń qoldaýyna táýeldi bolmai, óz betimen tolyqqandy kino týyndysyn shyǵara alady. Sondyqtan Astanada ótken bul naǵyz jahandyq aýqymdaǵy film festivaline álem jurtshylyǵy airyqsha nazar aýdardy», – dedi Qasym-Jomart Toqaev.
Alaida Prezident ozyq tehnologiia dáýirinde kitap oqýdyń da mán-mańyzyn arttyrýymyz qajet sanaidy. Bul rette Memleket basshysy óskeleń urpaqqa osy qundylyqty sińirýge tutas qoǵam atsalysýy qajet ekenin aitty.
«Halqymyzdyń asyl perzenti Ábish Kekilbaevtyń «Adamdy adam etken – kitap, adamzat etken – kitaphana» degen tamasha sózi bar. Kitap bilimpazdyqqa, janashyrlyqqa, parasattylyqqa, eńbekqorlyqqa baýlidy. Kitap oqý – azamattardy, ásirese, jastardy ústirt oilaýdan jáne aqparat tasqynyna jutylyp ketýden saqtap qalatyn rýhani qalqan. Sondyqtan men biyl mamyr aiynda «Kitap oqý mádenietin damytý jáne zerdeli ult qalyptastyrý jónindegi sharalar týraly» Jarlyqqa qol qoidym. Bul mindetti júzege asyrý úshin Úkimet jyl sońyna deiin tiisti tujyrymdama qabyldaidy», – dedi Qasym-Jomart Toqaev.
